Xaçmazda bıçaqlanan ata və oğlu ilə bağlı yeni DETALLAR

Bu gecə Xaçmazın Nabran İnzibati Ərazi Dairəsinə daxil olan Tel kəndində baş verən hadisə zamanı dünyasını dəyişən 2009-cu il təvəllüdlü yeniyetmə Bakı məktəblisi olub. Mərhum məktəbli Bakının Yasamal rayonundakı 53 saylı tam orta məktəbin şagirdi olub.

Bizim.media-nın əldə etdiyi məlumata görə, qətl hadisəsini törədən 34 yaşlı Bakı şəhər sakini Səhram Manafzadə hər il yay aylarında qayınatası burada yaşadığına görə Tel kəndinə gəlib burada dincəlirmiş. Onun mübahisə etdiyi şəxs - Nurlan Məmmədrəhimov rayonun Köhnə Xudat kəndindən olsa da, Bakıda yaşayırmış.

Zərərçəkənlə hadisəni törədən şəxs arasında bir müddətdir mübahisə olub. Ötən gün gecə saatlarında Səhram Manafzadə ilə Nurlan Məmmədrəhimov arasında telefon danışığı olub. Telefon danışığında Səhram Manafzadə Nurlan Məmmədrəhimovu Tel kəndinə çağırıb. Məlum qətl hadisəsi də onların mübahisəsi zamanı baş verib. Hadisə zamanı hər iki şəxs sərxoş olub. Atasının Səhram Manafzadə ilə davasını görən məktəbli avtomobildən düşərək onları ayırmaq istəyib. Bu zaman atanı bıçaqlayan Səhram Manafzadə onun oğluna da ürək nahiyəsindən bir bıçaq zərbəsi endirib. Məktəbli dərhal keçinib. Ata - Nurlan Məmmədrəhimov isə Xaçmaz Rayon Mərkəzi Xəstəxanasına çatdırılıb. Hadisəni törədən Səhram Manafzadə hadisə yerindən yayınsa da, Xaçmaz polisi onu Nabranda yaxalayıb istintaqa təhvil verib.

Faktla bağlı cinayət işi açılıb və Xaçmaz rayon prokurorluğu tərəfindən araşdırılır.

Xaçmazda bıçaqlanan ata və oğlu ilə bağlı yeni DETALLAR

09:52

Xaçmaz rayonunun Nabran qəsəbəsində bıçaqlanma hadisəsi baş verib.

APA xəbər verir ki, Xaçmaz rayonunun Köhnə Xudat kəndinin sakinləri 1988-ci il təvəllüdlü Nurlan Məmmədrəhimov və oğlu 2009-cu il təvəllüdlü Cavidan Məmmədrəhimov tanıdıqları şəxs tərəfindən aralarında yaranan mübahisə zamanı bıçaqlanıblar. Nəticədə, 15 yaşlı Cavidan Məmmədrəhimov aldığı bıçaq xəsarətlərindən hadisə yerində ölüb. Nurlan Məmmədrəhimov isə Xaçmaz Rayon Mərkəzi Xəstəxanasına yerləşdirilib.

Xaçmaz Rayon Prokurorluğundan verilən məlumata görə, araşdırma zamanı 1990-cı il təvəllüdlü Şəhram Manafzadənin rayonun Tel kəndi ərazisində şəxsi münasibətlər zəminində aralarında yaranmış mübahisə zamanı yetkinlik yaşına çatmayan şəxsə bıçaqla xəsarətlər yetirərək onu qəsdən öldürməsi, sonuncunun atası Nurlan Məmmədrəhimova isə xəsarət yetirməsinə əsaslı şübhələr müəyyən edilib.

Faktla bağlı Xaçmaz Rayon Prokurorluğunda Cinayət Məcəlləsinin 120.1-ci (qəsdən adam öldürmə) və 29, 120.2.7-ci (iki şəxsi qəsdən öldürməyə cəhd) maddələrilə cinayət işi başlanıb. Şəhram Manafzadə iş üzrə şübhəli şəxs qismində tutulub.

İbtidai istintaq davam etdirilir.