Azərbaycan-İran biznes forumu TƏXİRƏ SALINDI

Bakıda iyunun 18-də keçirilməsi planlaşdırılan Azərbaycan-İran biznes forumu qeyri-müəyyən müddətə təxirə salınıb.

Oxu.Az xəbər verir ki, bu barədə "Report"a Beynəlxalq İstehsalçılar, İxracatçılar və İdxalçılar Klubundan (ICMEI) məlumat verilib.

Forumda İranın təxminən 50-i şirkətinin iştirakı planlaşdırılırdı.

Görüş çərçivəsində iki ölkənin sahibkarları arasında əməkdaşlıq perspektivlərinin müzakirəsi və yeni işgüzar əlaqələrin qurulmasına yönəlmiş B2B danışıqları planlaşdırılmışdı.

Bu forum 2025-ci ildə Azərbaycan və İran arasında bu növ artıq ikinci tədbir olmalı idi.

ICMEI-nin məlumatına görə, hazırda Azərbaycanda təxminən 2 980 İran şirkəti qeydiyyatdadır. İranın ölkə iqtisadiyyatına investisiyalarının məbləği 5 milyard ABŞ dollarını keçib.

Dövlət Gömrük Komitəsinin məlumatına əsasən, bu ilin yanvar-aprel aylarında iki ölkə arasında ticarət dövriyyəsinin dəyəri 204.54 milyon ABŞ dolları təşkil edib. Bu isə ötən ilin eyni dövrü ilə müqayisədə 11.5% çoxdur. 5 ayda Azərbaycandan İrana ixracın dəyəri 5.85 milyon ABŞ dolları (+29%), bu ölkədən idxalın dəyəri isə 198.69 milyon ABŞ dolları (+11.1%) təşkil edib.

2024-cü ildə isə iki ölkə 2023-cü illə müqayisədə 33% çox - 647 milyon ABŞ dolları dəyərində ticarət əməliyyatları aparıb. Rəsmi Bakı və Tehran bu göstəricini növbəti 5 il ərzində 10 milyard ABŞ dollarına çatdırmaq məqsədi qoyub.

Qeyd edək ki, son günlər İranla İsrail arasında gərginlik artıb. Tərəflər bir-birinə qarşı silsilə raket hücumları həyata keçirirlər. Partlayışlar nəticəsində yüzlərlə insan həlak olub.