"Müasir şəhərləşmə prosesi getdikcə təbii resurslar və kənd təsərrüfatı sahələri üzərində daha böyük təzyiq yaradır. Bu gün dünyada şəhərləşmə təbiəti "udmağa" başlayıb".
Oxu.Az xəbər verir ki, bunu BMT-nin Məskunlaşma Proqramının (UN-Habitat) icraçı direktoru Anaklaudia Rossbax Bakıda keçirilən Ümumdünya Şəhərsalma Forumunun 13-cü sessiyası (WUF13) çərçivəsində təşkil olunan "İqlim-mənzil əlaqəsi: bərabərsizliyi və ya yerdəyişməni dərinləşdirmədən iqlimə davamlı mənzillərin sayını necə artıra bilərik?" mövzusunda sessiyada deyib.
Onun sözlərinə görə, plansız şəhərləşmə ətraf mühitə ciddi zərər vurmaqla yanaşı, kənd təsərrüfatı potensialını da zəiflədir.
"Bu, ərzaq təhlükəsizliyini və Yer üzündə həyatın davamlılığını təhdid edir. Bu gün şahidi olduğumuz bir çox iqlim hadisələri düzgün planlaşdırılmayan şəhərləşmənin nəticəsidir. İnsanların və təbiətin ehtiyaclarını nəzərə almayan yanaşma bizi bu vəziyyətə gətirib çıxarıb", - deyə o bildirib.
Anaklaudia Rossbax vurğulayıb ki, həm mövcud problemlərin həlli, həm də gələcəyin düzgün planlaşdırılması üçün torpaq resurslarından səmərəli istifadə həyati əhəmiyyət daşıyır.
"Torpaq məhdud resursdur. Buna görə də onun düzgün planlaşdırılması və idarə olunması xüsusi önəm kəsb edir", - deyə "UN-Habitat" rəhbəri əlavə edib.
