Deputat: "Paşinyanın "Sülh kəsişməsi" layihəsi xəyal olaraq qalacaq"

"Azərbaycan icra edilmiş tranzit nəqliyyat dəhlizləri ilə beynəlxalq nəqliyyat mərkəzinə çevrilib. Ərazimizdən keçən Şimal-Cənub və Şərq-Qərb nəqliyyat dəhlizləri ölkəmizin Avrasiya regionunda əhəmiyyətini artırıb. Bakı Beynəlxalq Ticarət Limanının gücü 15 milyon tondan 25 milyon tona artırılıb. Dəmir yollarının keçiricilik imkanlarının yüksəlməsi istiqamətində layihələrin icrası davam edir. Bakı-Tbilisi-Qars dəmir yolunun yükaşırma gücünün 1 milyon tondan 5 milyon tona çatdırılması ölkəmizin tranzit imkanlarının genişlənməsinə səbəb olub və bu, həm iqtisadi, həm də siyasi mövqelərimizi gücləndirir".

Bunu Oxu.Az-a açıqlamasında Milli Məclisin İqtisadi siyasət, sənaye və sahibkarlıq komitəsinin sədr müavini Azər Badamov deyib.

O bildirib ki, yanvarın 28-də nəqliyyat məsələlərinə həsr olunmuş müşavirədə dövlət başçısının səsləndirdiyi fikirlər son 20 ildə ölkəmizdə həyata keçirilən, yol-nəqliyyat infrastrukturunun yenidən qurulması ilə bağlı görülən işlərlə yanaşı, qarşıda icra olunmalı layihələrin həcminin də nə qədər böyük olacağını göstərir:

"Dövlət başçısının qeyd etdiyi kimi, Azərbaycan əhalisinin sürətlə artımı nəqliyyat problemlərinin həlli istiqamətində addımların vaxtında atılmasını labüd edir. Eyni zamanda, ölkə ərazisindən daşınan yüklərin həcmi sürətlə artmaqdadır və bu, Azərbaycandan keçən beynəlxalq dəhlizlərin genişləndirilməsini də vacib edir", - deyə millət vəkili vurğulayıb.

Prezident İlham Əliyevin çıxışında Zəngəzur dəhlizi ilə bağlı fikirlərinin böyük əhəmiyyət daşıdığını deyən A.Badamov Ermənistanın 10 noyabr 2020-ci il tarixli üçtərəfli bəyanatda üzərinə götürdüyü öhdəliyi icra etməyə məcbur olduğunu bildirib:

"Zəngəzur dəhlizi terminini beynəlxalq leksikona gətirdiyimizi qeyd edən dövlət başçısı, bu dəhlizin açılaması istiqamətində Ermənistanın öhdəliyi olduğunu bir daha bəyan etdi. Əlbəttə, Zəngəzur vaxtilə Azərbaycandan qoparılaraq Ermənistana verildiyi üçün, ayrılmaz hissəmiz olan Naxçıvan Muxtar Respublikası ölkəmizin əsas hissəsindən ayrı düşüb. Paşinyanın məsələyə qeyri-konstruktiv yanaşması nəticəsində 4 ildən çoxdur ki, Naxçıvana maneəsiz yol açılmamış olaraq qalmaqdadır. Təbii ki, Azərbaycan Ermənistanı gözləmək fikrində deyil və İranla əldə olunmuş razılığa əsasən, Araz çayının sol sahilindən yeni yol çəkilməklə əlaqəmiz təmin olunacaq. Amma Zəngəzur dəhlizinin açılması bizim əsas məqsədlərimizdəndir və Ermənistan bunu qəbul etməyə məcburdur. Təəssüf ki, Paşinyan beynəlxalq ictimaiyyətin diqqətini "Sülh kəsişməsi" adlandırılan absurd və guya ki, alternativ layihə üzərinə yönəltməyə çalışır. Amma hər kəs bilməlidir ki, Azərbaycansız heç bir regional layihənin icrası mümkün deyil. "Sülh kəsişməsi" layihəsi xəyal olaraq qalacaq".

Mərahim Nəsib