Elçin Aslangil yazır...
Nimdaş komsomolçu Sergey Aleksandroviç Mardan keçənlərdə Ukraynaya məxsus PUA-ların Olya limanına hücum etməyə çalışdığını, lakin Rusiyanın hava hücumundan müdafiə qüvvələri tərəfindən zərərsizləşdirildiyini bildirdi. Bu PUA-ların Azərbaycan istiqamətindən gəldiyini iddia edərək "Bakını nə vaxt bombalayırıq?" sualı ilə sərsəmlədi.
Sonra da Azərbaycan dövlətçiliyinə dil uzatdı. Azərbaycan dövlətçiliyinin Rusiya tərəfindən Azərbaycan xalqına hədiyyə edildiyini dedi.
Bu artıq axmaqlıqdır!
Ona görə axmaqlıqdır ki, Mardan indiki Rusiya dövlətinin çar Birinci Pyotra hədiyyə edildiyi tarixdən xəbərsizdir. Yaxud həmin tarixdəki bəzi mətləblərdən də xəbərdar olduğu üçün "qeyrət"inin qıcıq damarında qanı bu qədər zəhərlənib ki, kin qusur!
Həmin tarixi xatırlamayanlar üçün xatırladım:
1711-ci ildə sizin Böyük Pyotr dediyiniz çarınızı ordusu ilə birlikdə Baltacı Mehmet Paşa mühasirəyə almışdı və Rusiya imperiyası yox olmaq təhlükəsi ilə üz-üzə idi. Osmanlı sədrəzəmi Baltacı Mehmet Paşa çarınızın canını bağışlamasaydı, indiki Rusiyanı o vaxt Pyotra hədiyyə etməsəydi, sən kim olacaqdın, Mardan? Olacaqdınmı heç? Hələ başqa dedi-qodular da var - Baltacı Mehmet Paşanın Prut savaşında qurulmuş çadırı, Yekaterina və sair...
Mardançik, türk xalqı sənə və sənin Rusiyana çox hədiyyələr verib. Rusiyanı yox olmaqdan çox xilas edib.
Çox uzağa getməyək: Rusiyanı Hitlerin caynağından Bakı nefti xilas etmədimi?
Kim kimə dövlət və dövlətçilik hədiyyə edib?
Kremlin güngörməz yerində oturub, başı qaçan Mardançik bilmirmi ki, belə iyrənc təkəbbürlə məsuliyyətsiz çıxışlar, irqçiliyi dəstəkləmək çastuşka deyişməsinə bənzəməz, Rusiyanın sonu ola bilər?
Tərkibindəki istila edilmiş türk xalqları, onların əraziləri ilə dünyaya xox gəlmək Rusiyanın böyük dövlət olması demək deyil. Bu, Rusiya dövlətinin hər an fitili yandırıla biləcək bombanın üstündə oturması deməkdir.
Mardanın ağıllı görkəmlə səsləndirdiyi bəyanatlar ilk növbədə elə Rusiyanı idarə edənləri çıxılmaz vəziyyətdə qoyur. Çünki bunu nə Azərbaycan xalqı, nə də Prezidenti unudandır. Türk birliyi üçün əlindən gələni edən İlham Əliyevə sayğı duyan digər türk liderlər də unudan deyillər. Çünki onlar da dəfələrlə belə hücumlara məruz qalıblar. Gələcəkdə məruz qalmaq ehtimalları da çoxdur.
Başqalarının torpağına, dövlətçiliyinə, azadlığına göz dikməyin səbəbidir ki, Rusiya indi bölgədə tək qalıb: sanksiya ardınca sanksiya, iqtisadi məngənə, tükənən insanlıqdan heç danışmıram. Ölkə getdikcə zülmətə qərq olur.
O zülmətdən də ara-sıra Vladimir Solovyov, Sergey Mardan kimi Kreml çaqqallarının zingiltisi yüksəlir.
Nədir qarnınızın ağrısı? Aqoniyadasınız yoxsa? Biləsiniz ki, qaranlığa çəkilib ətrafdakıları qapmaq, ağzının suyunu dağıtmaq quduzluğun əlamətidir. Onun da axırı heç yaxşı qurtarmır.
Bir xeyli təcrübəli Rusiya hökumətinin üzvlərinə səslənirəm - it quduranda birinci öz sahibini qapır. İtinizin təkcə başını yox, ağzını da bağlı saxlayın...
