Rusiya mətbuatında hakimiyyətin, dövləti idarə edən imperialist təfəkkürün, bəşəriyyət üçün təhlükə saçan düşüncə tərzinin o qədər əlaltısı var ki, hər ötən gün biri gedən karvanın arxasınca düşməyə başlayır.
Çünki pula satılmış qələmlər Rusiya mətbuatında hər zaman at oynadıblar. Belələri hər zaman istənilən mövzuda söz demək haqqını özlərində görüblər. Çünki onlar üçün hansısa mövzuda iyrəncliyə əl atmaq an məsələsidir, çox rahat gözünü yumursan, ağzını açırsan, geriyə qalır, sadəcə, sərsəm fikirləri axıcı bir şəkildə cəmiyyətə sırımaq. Belə olanda isə mükafat alırsan, vaxt keçdikcə arxandakıların da dəstəyi ilə çevrilirsən Vladimir Solovyova, Sergey Maydana və bu qəbildən olan mətbuat tör-töküntülərinə.
Yeri gəlmişkən, Sergey Mardan da Azərbaycanın hər ötən gün gözdən itən, getdikcə daha irəli gedən uğur karvanının arxasınca gözünü yumub, ağzını açanların cərgəsinə qoşulub. Təbii ki, növbəti sifariş və növbəti imperialist düşüncənin əlaltısı kimi...
Azərbaycan və onun lideri haqqında söz demək cürətini özündə görən bu "cırtdan imperialist" hesab edir ki, Azərbaycanda Sovet İttifaqının tarixi əhəmiyyəti, mövqeyi düzgün qiymətləndirilmir. Nə hikmətdirsə, bu bir iki sərsəm jurnalistdən başqa heç kim Sovet İttifaqının "möhtəşəmliyi"ni dərk etmək iqtidarında deyil. Yalnız bu tip satılmış qələmlər tarixi "düzgün" qiymətləndirir, hər şeyin yerini, hər şeyin dəyərini görə bilir. Bu isə həqiqətlərə kor baxmağın sayəsində mümkün olur. Sırf riyakarlığı özünə peşə seçərək, qələmini pula, siyasi maraqlara, imperializmin ən iyrənc xislətinə sataraq mümkün olur.
Elə isə belələrinə xatırlatmaq gərəkdir ki, hansısa sərsəm fikirləri gözünü yumub karvanın arxasınca çığıran biri Azərbaycan xalqına, onun liderinə, tarixinə söz demək iqtidarında deyil, ona bu həddi yalnız ifrat riyakarlığı verirsə, həddini və yerini göstərəcək olan da Azərbaycanın haqq səsidir. Müzəffər Azərbaycan bu tip qələmi bank hesabındakı rəqəmlərlə paralel işləyən simasızları o qədər incidib ki, gedən qatarın arxasınca hürən canlı hansı olur-olsun, çevrilib baxmaq niyyətində deyilik.
Amma həqiqətləri də xatırlatmaqda hər zaman fayda var. Sovet İttifaqı zorla daxil olduğu bütün məmləkətlərə bəla gətirib. Xalqların azadlığını əlindən alıb, qanla hakimiyyət qurub, hakimiyyəti altındakı torpaqlarda hər zaman yerli xalqlara qarşı ayrı-seçkilik olub. Aclıq, talanlar, repressiyalar, deportasiyalar - SSRİ-nin "şanlı tarixi"ndə iyrənc olan nə desən var... Hələ 20 yanvar 1990-cı ildə törətdiyi Bakı qətliamını xatırlatmağa gərək belə duymuruq. Bu XX əsrin ən dəhşətli faciələrindən biri məhz SSRİ rəhbərliyinin əli ilə bilərək, istəyərək törədilib.
Sergey Mardanın fikrincə, biz SSRİ-də yaşadığımız üçün özümüzü xoşbəxt saymalı, buna görə özümüzü borclu hiss etməliyik. Nəyə görə? Saysız-hesabsız bəlalara, yaxud 70 illik əsarətə görə?
Xeyr, imperialistlərin ən balacası, cənab "cırtdan imperialist". Azərbaycan xalqının başına gəlmiş bir çox bəlaların arxasında məhz sizin qürurla haqqında bəhs etdiyiniz SSRİ-nin əli var. Azərbaycanın azadlığı və bu gün əldə etdiyi uğurlar, yəqin ki, sizin kimiləri rahat yatmağa qoymur, ancaq yuxunuz ərşə çəkilsə də, Azərbaycan öz liderinin öndərliyində haqq yolunda uğurla irəliləyir. Biz hər zaman bu uğur karvanıyla gələcəyə addımlayacağıq, sizin kimilər isə hələ bu karvanın arxasınca çox hürəcəklər...
Orxan Tağıyev
