"Ermənistan artıq dərk edib ki, öz inkişafı üçün Azərbaycan və Türkiyə ilə əlaqələr həyati əhəmiyyət daşıyır".
Oxu.Az xəbər verir ki, bu barədə Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev Türkiyənin "Milliyet" qəzetinin əməkdaşı ilə söhbətində deyib.
O bildirib ki, ən sevindirici hal odur ki, Cənubi Qafqazda sülh hökm sürür.
"Əgər Ermənistan-Azərbaycan müharibəsi davam etsəydi, qonşuluğumuzdakı münaqişələrdən qığılcımlar buraya da keçə bilərdi. Qafqazda sülh var və bu, qalıcı bir sülhdür. Ermənistan-Azərbaycan sülh prosesi sadəcə kağız üzərindəki bəyanatdan ibarət deyil. Azərbaycan bunu əməldə də sübuta yetirib.
Prezidentin köməkçisinin sözlərinə görə, Azərbaycanın təşəbbüsü sayəsində 2023-cü ildən 2025-ci ilə qədər olan dövrdə, cəmi iki il ərzində sülhə nail olundu.
"Avropada, Brüsseldə hamı sülhdən danışmağı sevir. İkinci Dünya müharibəsinin 1945-ci ildə başa çatmasına baxmayaraq, Fransa və Almaniya Yelisey Sülh Müqaviləsini 1963-cü ildə - 17-18 il sonra imzaladılar. Biz isə iki il sonra sülh müqaviləsini hazırladıq. Ermənistanın bizə qarşı soyqırımı törətməsinə rəğmən, məqsədimizin yalnız sülh olduğunu nümayiş etdirdik", - deyə Hikmət Hacıyev bildirib.
Ermənistanda hazırkı rəhbərliyin siyasətindən də danışan Hikmət Hacıyev onu da bildirib ki, Ermənistanın hazırkı rəhbərliyinin "həqiqi Ermənistan" konsepsiyasını əsas yanaşma kimi qəbul etməsi təqdirəlayiq haldır. Onun sözlərinə görə, Ermənistanda yeni konstitusiyanın qəbul edilməsindən sonra sülh müqaviləsinin imzalanmasında heç bir problem qalmır. Hikmət Hacıyev bildirib ki, məqsəd Azərbaycan-Ermənistan və Türkiyə-Ermənistan sülh proseslərini paralel şəkildə inkişaf etdirərək yekun nəticəyə çatmaqdır.
Prezident köməkçisi bildirib ki, Ermənistan rəhbərliyi artıq reallıqları və işğalın əslində illərlə onları əsir saxladığını dərk edib, bunun böyük bir yanlış olduğunu anlayıb. Ermənistan inkişaf etmək üçün Azərbaycan və Türkiyə ilə münasibətlərin nə qədər mühüm olduğunu qəbul edib.
Zəngəzur dəhlizindən də danışan Hikmət Hacıyev qeyd edib ki, sözügedən dəhlizin açılması artıq yeni geosiyasi reallığın ayrılmaz bir parçasıdır.
"Bu layihə bizim maraqlarımıza cavab verdiyi kimi Ermənistanın da maraqlarına xidmət edir. Çünki Ermənistan da bölgədə tranzit imkanlarına sahib olmasının zəruriliyini anlayır. Sülh müqaviləsi mətni artıq paraflanmış və dəqiqləşdirilmiş bir sənəddir. ABŞ və Ermənistan arasında imzalanan ortaq bəyannamədə "Tramp dəhlizi" olaraq adlandırılan koridorla bağlı artıq bir razılaşma mövcuddur. Amerikalıların bizə verdiyi məlumata görə, texniki-iqtisadi əsaslandırma işləri bu yay başa çatacaq və ardınca dərhal tikinti işlərinə başlanılacaq. Azərbaycan və Türkiyə olaraq biz artıq öz işlərimizi regionda qurmuşuq. Hər hansı bir bağlantı qopması problemimiz yoxdur. Bakı-Tbilisi-Qars dəmir yolu bu gün fəaliyyətdədir. TANAP-ımız və TAP-ımız var. Əgər Ermənistan da bu regional infrastruktur layihələrinin bir hissəsi olmaq istəyirsə, buyura bilər", - deyə siyasətçi qeyd edib.
