Kreml: "Ukrayna üçün təhlükəsizlik zəmanətləri danışıqlar üçün mürəkkəb mövzudur"

"Ukrayna üçün mümkün təhlükəsizlik zəmanətləri çox mürəkkəb mövzu və müzakirələr predmetidir".

Oxu.Az-ın TASS-a istinadən məlumatına görə, bu barədə Rusiya prezidentinin mətbuat katibi Dmitri Peskov jurnalistlərə bildirib.

Onun sözlərinə görə, hazırda belə zəmanətlərin hər hansı konkret parametrlərini söyləmək mümkün deyil.

"Hələlik bu kontekstdə hər hansı konkretlikdən danışmaq mümkün deyil. Bu çox mürəkkəb mövzudur. Bütün bunlar, şübhəsiz ki, müzakirə olunacaq və müzakirə olunmalıdır. Hələlik heç kim konkret parametrləri təbii ki, söyləməyəcək", - deyə Peskov hansı zəmanətlərdən söhbət gedə biləcəyi barədə suala cavab verərkən vurğulayıb.

Daha əvvəl Rusiya Birbaşa İnvestisiya Fondunun (RBİF) rəhbəri və Rusiya prezidentinin xarici ölkələrlə iqtisadi əməkdaşlıq üzrə xüsusi nümayəndəsi Kirill Dmitriyev Vaşinqtona səfərinin nəticələrinə görə qeyd edib ki, Kiyevin NATO-ya daxil olması tamamilə qeyri-mümkündür, lakin bu və ya digər təhlükəsizlik zəmanətləri müəyyən formada qəbul edilə bilər.