"Azərbaycanda təhsil sisteminin əsas prinsiplərindən biri hər kəs üçün bərabər və sağlam təhsil mühitinin yaradılmasıdır".
Bu fikirləri Oxu.Az-a açıqlamasında Milli Məclisin İctimai birliklər və dini qurumlar komitəsinin üzvü Səbinə Salmanova Nazirlər Kabinetinin təsdiq etdiyi təhsilalanlar üçün yeni geyim standartını şərh edərkən deyib.
O bildirib ki, sosial statusundan, ailəsinin maddi imkanlarından, etnik və dini mənşəyindən asılı olmayaraq hər kəs eyni şəraitdə təhsil almalı və bərabər imkanlara malik olmalıdır:
"Bu baxımdan vahid məktəbli forması yalnız geyim məsələsi deyil, Azərbaycanda məktəb mühitində bərabərlik, nizam-intizam və vahid təhsil mədəniyyətinin formalaşdırılması baxımından çox əhəmiyyətlidir.
Vahid məktəbli forması şagirdlər arasında sosial-iqtisadi fərqlərin geyim vasitəsilə ön plana çıxmasının qarşısını almağa və ayrı-seçkilik risklərini azaltmağa imkan verir. Eyni zamanda, vahid forma məktəbdə səliqəli və ümumi görünüş mədəniyyətinin formalaşmasına, şagirdlərdə kollektivə aidlik və məktəb kimliyi hissinin güclənməsinə müsbət təsir göstərə bilər.
Uşaqların eyni parta arxasında oturarkən geyimlərinə görə bir-birindən fərqləndirilməməsi vacibdir. Bu, onların bir-biri ilə münasibətlərinə də təsir edən amillərdən biridir. Məktəbdə əsas meyar uşağın geyimi və ailəsinin maddi imkanları deyil, onun təhsili və davranışı olmalıdır".
Deputat qeyd edib ki, məktəbli forması tədris prosesinə və yaş xüsusiyyətlərinə uyğun, rahat və praktik istifadə prinsipləri əsasında müəyyən edilir:
"Burada əsas məqsəd şagirdlərin rahatlığını təmin etməklə yanaşı, məktəb mühitində vahid və səliqəli görünüş yaratmaqdır. Məktəbli forması uşaqların gündəlik təhsil prosesində özlərini rahat hiss etməsinə və sərbəst hərəkət etməsinə imkan verməlidir.
Bu baxımdan vahid məktəbli formasının tətbiqi yalnız müəyyən geyim standartının qorunması kimi qiymətləndirilməməlidir. Burada əsas məqsəd məktəbdə sağlam psixoloji mühitin, bərabər münasibətlərin və vahid təhsil mədəniyyətinin formalaşdırılmasıdır".
