İyunun 2-də Milli Məclisdə Beynəlxalq Siqh Federasiyasının nümayəndələri ilə görüş keçirilib.
Oxu.Az-a bu barədə parlamentin Mətbuat və ictimaiyyətlə əlaqələr şöbəsindən məlumat verilib.
Görüşdə Azərbaycanın tarix boyu işğal, etnik təmizləmə, soyqırımı və insan hüquqlarının pozulması kimi ağır sınaqlarla üzləşdiyi, bu səbəbdən ölkəmizin müxtəlif regionlarda hüquqları pozulan xalqların, etnik və dini icmaların problemlərinə həssas yanaşdığı bildirilib. Həmçinin, ölkəmizin onların beynəlxalq hüquq çərçivəsində apardıqları dinc mübarizəyə mənəvi dəstək göstərdiyi qeyd edilib.
Kanada Siqh Federasiyasının sədri Moninder Singh onlara verilən dəstəyə görə təşəkkürünü bildirib.
Söhbət zamanı sülh dialoqunun əhəmiyyəti, insan hüquqlarının müdafiəsi, dini azadlıqların təmin olunması, etnik və dini icmaların hüquqlarının beynəlxalq səviyyədə qorunması istiqamətində əməkdaşlıq imkanları barədə fikir mübadiləsi aparılıb.
