Sabah son 100 ilin ən uzun Ay tutulması baş verəcək.
Bunu Oxu.Az-a Azərbaycan Mili Elmlər Akademiyasının (AMEA) Nəsirəddin Tusi adına Şamaxı Astrofizika Rəsədxanasının elmi işlər üzrə direktor müavini, fizika üzrə fəlsəfə doktoru Xıdır Mikayılov deyib.
Onun sözlərinə görə, bu ilin növbəti ay tutulması iyulun 27-dən 28-ə keçən gecə baş verəcək:
“Bu təbiət hadisəsi Bakı vaxtı ilə saat 22:24:27-də başlayacaq. Proses 3 saat 56 dəqiqədə davam edəcək və tutulma prosesi 02:19-də başa çatacaq. Ayın qaranlıqda olma vaxtı isə 1 saat 43 dəqiqə çəkəcək. Builki ay tutulması son 100 ilin ən uzun tam tutulması hesab olunur”.
Fəlsəfə doktoru “Qanlı Ay” tutulması barədə də danışıb:
“Ayın tutulması başlayan anda ayın rəngi tutqunlaşmağa başlayır. Ay yerin kölgəsinə daxil olan zaman tutulmanın gözümüzlə müşahidə edə bilirik. Ay tutulduğu zaman tünd qırmızı, qəhvəyi rəngdə ola bilər. Rənglərin bu cür müxtəlif olması atmosferdəki fiziki şəraitdən asılıdır. Qorxulu bir hadisə deyil. Ay rəngi qırmızı rəngdə olduğu üçün el arasında “Qanlı Ay” tutulması deyilir”.
Xıdır Mikayılov qeyd edib ki, bu ilki ay tutulmasının özəlliyi odur ki, sabah səhər saatlarında Mars planetinin Yerlə böyük qarşıdurması hadisəsi də baş verəcək:
“Bu hadisə 15-17 ildən bir baş verir. Təsadüf nəticəsində bu hadisə sabh olacaq Ay tutulması ilə üst-üstə düşür. Sonuncu dəfə 2003-cü ilin avqust ayının 28-də belə bir hadisə olub.
Bu il isə iyulun 27-də olacaq. Növbəti belə hadisə 2035-ci ildə gözlənilir. Bu qarşıdurma zamanı Mars yerə adi haldan 5 dəfə daha yaxın olur. Eyni zamanda, Mars parlaq, ölçüsü böyük görünür və yerə 57,08 milyon kilometr məsafəyə qədər yaxınlaşacaq”.
Direktor müavini vurğulayıb ki, Ay tutulması dünyanın əksər yerindən, o cümlədən də Azərbaycanda müşahidə etmək mümükün olunacaq:
“Ayın qarşısında bulud olmasa, hava şəraiti imkan versə, bütün insanlar ay tutulmasın izləyə biləcəklər. İnsanların sağlamlığı üçün heç bir qorxusu yoxdur. Sadəcə psixoloji problem olan insanlar sarsıntı keçirə bilərlər”.
İlhamə Əbülfət
www.oxu.az
Rəylər