"Hidayət Heydərov" teqi üzrə xəbərlər
1997-ci ildə Qazaxıstanın Karaqanda şəhərində dünyaya göz açan Hidayət Heydərov əslən Göyçay rayonundandır. Onun ailəsi Hidayətin 3 yaşı olanda Bakıya köçüb. Uşaqlıqdan idmana böyük maraq göstərən Hidayət altı yaşında cüdo ilə məşğul olmağa başlayıb və ilk müəllimi Tərlan Həsənov olub.
Gənc yaşlarından öz əzmi və istedadı ilə seçilən Hidayət qısa zamanda cüdoda uğur qazanmağa nail olub. O, 2008-ci ildə Bakı, 2009-cu ildə isə Azərbaycan çempionu olub. 60 kq çəki dərəcəsində iki dəfə ölkə çempionluğunu qazanan Hidayət beynəlxalq arenada da öz sözünü deyib. 2010-cu ildə Tbilisidə gümüş, 2011-ci ildə isə Ankarada Avropa kubokunda qızıl medal əldə edib.
2012-ci ildə Azərbaycan yeniyetmə yığmasına dəvət alan cüdoçumuz Antalyada keçirilən Avropa kubokunda bütün rəqiblərini üstələyərək qızıl medala sahib olub. Hidayət daha sonra 73 kq çəki dərəcəsinə keçid edib. Bu çəkidə ölkəmizi Elnur Məmmədli və Rüstəm Orucov kimi Olimpiya mükafatçıları təmsil edib.
Hazırda dörd qat Avropa çempionu olan Hidayət 2017, 2022, 2023 və 2023-cü illərdə qitə birinciliyində fəxri kürsünün ən yüksək pilləsinə qalxıb. Bundan başqa o, Avropa çempionatlarında 2 bürünc və 1 gümüş medal da qazanıb.
Dünya çempionatlarında bir neçə dəfə bürünc medalla kifayətlənən Hidayət bu il arzusuna çataraq qızıl medal əldə etməyi bacarıb. O, Abu-Dabidə keçirilən dünya çempionatında Kosovo, Braziliya və Almaniya idmançılarını məğlub edərək finala yüksəlib. Həlledici görüşdə isə yaponiyalı Tatsuki İşiharanı vaxtın sonunda ipponla üstələyib.
Karyerası boyu bir çox mötəbər turnirlərdə qalib olan Hidayətin kolleksiyasında yalnız Olimpiya qızılı çatışır. Gənc cüdoçumuz bu il Parisdə keçiriləcək Yay Olimpiya Oyunlarında ölkəmizi təmsil edəcək və onun qızıl medal qazanacağına böyük ümid var. Hidayət Heydərov Azərbaycan cüdosunun parlaq ulduzu olaraq gələcəkdə daha böyük uğurlara imza atacağına şübhə yoxdur.
