Azərbaycan idman tarixinə adını qızıl hərflərlə yazdırmış əfsanəvi cüdoçu, müstəqil Azərbaycanın ilk Olimpiya çempionu Nazim Hüseynov 1992-ci il Barselona Olimpiadasında qazandığı tarixi zəfərlə milli idmanın təməl daşını qoyub.
Hüseynov, həmçinin Avropa çempionu və dünya çempionatlarının mükafatçısıdır. Beynəlxalq arenada nümayiş etdirdiyi bənzərsiz texnikası və baxımlı fəndləri ilə dünya cüdo elitasında silinməz iz buraxıb.
Nazim Hüseynov 2 avqust 1969-cu ildə anadan olub. O, Olimpiya zirvəsinə də elə həmin gün - 2 avqust 1992-ci ildə yüksəlib.
Bu özəl gün münasibətilə əfsanəvi idmançımızı təbrik edir, ona uzun ömür və cansağlığı arzulayırıq.
Nazim Hüseynov Oxu.Az-a açıqlamasında bildirib ki, hər adama ad günündə Olimpiya Oyunlarının çempionu olub Azərbaycan bayrağını qaldırmaq qismət olmur.
O, torpaqlarımızın işğal altında olduğu çətin dövrdə bu çempionluq hissini yaşamağın xüsusi məsuliyyətini qeyd edib:
"O vaxt mənə dedilər ki, ad günündə tatamiyə çıxırsan, yəqin ki, bu sənə əlavə güc verər. Həmin Olimpiadada yarışlar ağır çəkidən başlayıb yüngül çəki ilə bitirdi. Mən 60 kq çəki dərəcəsində çempion oldum. Yarımfinalda Yaponiya təmsilçisi, son dünya çempionu Tadanori Koşinonu məğlub etdim. 1991-ci ildə dünya çempionatının bürünc medalını qazananda yarımfinalda məhz ona uduzmuşdum. Bir il sonra Olimpiadada yenə yarımfinalda qarşılaşdıq və bu dəfə üstün gəlməyi bacardım.
Bundan başqa, həmin il Avropa çempionu oldum. Finalda fransalı Filipp Pradayrolu ipponla məğlub etdim. Həmin fənd dünyanın ən baxımlı "101 ipponu" sırasına daxil edilib. Yaxşı xatırlayıram, görüşü cəmi 38 saniyəyə başa vurdum. Fransız azarkeşlər tribunadan onun adını qışqırırdılar, qələbədən sonra isə arenada "Hüseynov, Hüseynov" şüarları səsləndi. "101 ippon" siyahısına mənim və yapon idmançının yalnız üç ipponu düşüb. Həmin illəri ömrümün axırına qədər unutmayacağam. Olimpiadada bayrağımız qalxdı, himnimizi səsləndirdilər. Geridə qalan illər mənim üçün Olimpiya çempionluğu və nəvəmin dünyaya gəlməsi ilə yadda qalıb. Xoşbəxtlik budur. İndi günlərimi idman etməklə keçirirəm".
Veteran cüdoçu Olimpiya Oyunlarında başına gələn maraqlı faktı da bölüşüb:
"Bir gürcü cüdoçu vardı, Davit Xaxaleişvili. Biz bir-birimizə söz vermişdik ki, qalib gələcəyik, uduzan kişi deyil. Həmin vaxt yarışlara ağır çəkili idmançılarla start verirdilər.
Mən ona zarafatla dedim ki, bax, ilk sən başlayırsan, uduzsan, sən "yanacaqsan". Həmin vaxt çempion oldu və bu, mənə ruh verdi. Sonuncu gün isə Olimpiya zirvəsinə mən qalxdım.
Demişdim ki, gümüş və ya bürünc qazanmaq sayılmır, ancaq qızıl medal. Ondan sonra dostlaşdıq, danışırdıq. Bir müddət sonra isə vəfat etdi. Allah rəhmət eləsin".
N.Hüseynov bu il Bakıda keçiriləcək cüdo üzrə dünya çempionatında Azərbaycan idmançılarından gözləntilərini açıqlayıb:
"Öncəliklə qeyd edim ki, biz xoşbəxt ölkəyik ki, müstəqilik və dövlət başçımızın idmana böyük diqqəti var. Federasiyaya dövlət tərəfindən bütün şərait yaradılıb ki, idmançılar uğur qazansınlar.
İdmançılara yaxşı pul ayrılsa, onlar Yaponiya və digər ölkələrdə təlim-məşq toplanışları keçsələr, uğur qazanacaqlarına inanıram.
60, 81, 90 və 100 kq-da qızıl medal qazana bilərik. Digər çəkilərdə isə bürünc medal qazanmağa ümidliyik.
Hidayət Heydərov isə çempion olmasa da, bürünc medal qazanacaq. Hidayətə uğurlar arzu edirəm, amma inanmıram çempion olsun.
Baxın, Hidayətin üzərində mən işləmişəm, onun şəxsi məşqçisi isə Tərlan Həsənov olub. Hidayətin ailəsi ilə dost olmuşuq. O yarışa gedəndə cibinə 100 dollar qoymuşam.
O vaxt onu Bakıda keçiriləcək Avropa Oyunlarına da buraxsaydılar, qalib ola bilərdi. 2014-cü ildə ölkə çempionu olmuşdu. Onu 2016-cı ildə keçirilən Olimpiya Oyunlarında da görürdüm. Nəticə qazana bilərdi. Nəsə, oldu, keçdi.
Elnur Hidayəti "oğurlayıb" özünü reklam edir. Hazırda onlar mənim paxıllığımı çəkirlər.
Ümumilikdə isə baş məşqçi Riçard Trautman olduqca təcrübəlidir, onun sayəsində inkişaf edir, onunla birlikdə çalışmaq istəyərdim".
Olimpiya çempionu narazılığı barədə də danışıb:
"Baxın, mən cüdo məktəbi açmaq istəyirəm, amma imkan vermirlər. Həmçinin millinin baş məşqçisi olmaq istəyirdim, olmadı.
Hər şey 2023-cü ildən başladı. Dohada keçirilən dünya çempionatına məni aparmadılar. Rəşad Rəsullu (baş katib - red.) mənə dedi ki, maliyyə yoxdur deyə mümkün deyil.
İcraiyyə Komitəsinin üzvü Azər Əsgərovun sayəsində getdim. Sağ olsun, hamıya diqqət yetirir, bu yaxınlarda ev verdi.
Maaşımı da 2 000 manatdan 1 000 manata saldılar. Nəysə, hər şeyin zamanı var".
