Bu gün Azərbaycanda 2025-2026-cı tədris ili başa çatır və bütün ümumi təhsil müəssisələrində "Son zəng" çalınacaq.
Oxu.Az xəbər verir ki, ənənəvi tədbir hər bir təhsil müəssisəsinin ərazisində təşkil olunmalıdır.
Qeyd edək ki, bu il 116 550 məzun üçün "Son zəng" səslənəcək.
Onlardan 55 954 nəfəri qız, 60 596 nəfəri isə oğlan şagirddir.
Cari ildə işğaldan azad edilmiş ərazilərdə yerləşən ümumilikdə 25 ümumi təhsil müəssisəsində, o cümlədən 11 məktəbdə ilk dəfə "Son zəng" tədbiri keçiriləcək. Həmin məktəblərdə 171 məzun məktəblə vidalaşacaq.
Xatırladaq ki, 2015-ci ildən etibarən Azərbaycanın məktəblərində "Son zəng" mayın 31-də deyil, iyunun 14-də keçirilir. Nazirlər Kabinetinin 2014-cü il 30 oktyabr tarixli 362 nömrəli qərarı ilə "Ümumtəhsil məktəbinin Nümunəvi Nizamnaməsi"nə edilmiş dəyişikliyə əsasən, 2015/2016-cı tədris ilindən ümumtəhsil məktəblərində dərs məşğələləri sentyabrın 15-də başlayır və iyunun 14-də başa çatır.
Bu il iyunun 14-ü bazar gününə təsadüf etdiyindən "Son zəng" tədbirinin keçirilmə vaxtı bir gün əvvələ çəkilib.
