Azərbaycanda əkin sahələrindən səmərəli istifadə üçün yeni mexanizm tətbiq olunacaq.
Oxu.Az-ın "Qanun nə deyir?" rubrikasının bugünkü mövzusu torpaqların konsolidasiyası ilə bağlıdır.
Sözügedən məsələ hazırda Milli Məclisdə müzakirə mərhələsindədir və artıq plenar iclasa tövsiyə edilib.
Kənd təsərrüfatı təyinatlı torpaqların konsolidasiyası - torpaqlardan səmərəli istifadə məqsədilə mülkiyyətçilərin razılığı və ekvivalent bazar dəyəri əsasında torpaq sahələrinin birləşdirilməsi, bölünməsi, sərhədlərinin yenidən müəyyən edilməsi və ya dəyişdirilməsi (dövlət mülkiyyətində olan torpaqların özəl torpaqlarla dəyişdirilməsi halları istisna olmaqla) prosesidir. Bu proses həmçinin torpaq hüquqlarının yenidən rəsmiləşdirilməsini və ehtiyac yaranarsa, suvarma, meliorasiya, yol, enerji, işıqlandırma kimi mühəndis-kommunikasiya infrastrukturlarının təkmilləşdirilməsini də əhatə edir.
Layihəyə əsasən, torpaq sahələrinin ekvivalent bazar dəyəri "Qiymətləndirmə fəaliyyəti haqqında" Qanuna uyğun olaraq müstəqil qiymətləndirici tərəfindən müəyyən ediləcək. Konsolidasiya nəticəsində torpağın bazar dəyərinin artması mülkiyyətçi üçün əlavə ödəniş öhdəliyi yaratmayacaq. Əgər ayrılan yeni sahənin dəyəri əvvəlki sahənin dəyərindən aşağı olarsa, aradakı fərq mülkiyyətçiyə kompensasiya şəklində ödəniləcək.
Kənd təsərrüfatı təyinatlı torpaqların konsolidasiyası hazırlanan konsolidasiya layihəsi əsasında həyata keçiriləcək. Konsolidasiya layihəsində aşağıdakılar müəyyən ediləcək:
- mövcud torpaq sahələrinin sərhədlərinin, ölçülərinin, yerləşməsinin, bazar qiymətinin, mülkiyyət formasının və onlar üzərində mövcud olan mülkiyyət və digər əşya hüquqlarının təhlil edilməsi;
- torpaq sahələrinin yeni sərhədləri, ölçüləri və yerləşmə sxeminin torpaq sahəsinin mülkiyyətçiləri ilə razılaşdırılması;
- torpaq sahələrinin bölünməsi, birləşdirilməsi, dəyişdirilməsi;
- konsolidasiya olunmuş torpaq sahələri üzərində mülkiyyət və digər əşya hüquqlarının yenidən rəsmiləşdirilməsi;
- suvarma, meliorasiya, yol, enerji, işıqlandırma və digər mühəndis-kommunikasiya infrastrukturu üzrə dəyişikliklər.
Kənd təsərrüfatı təyinatlı torpaqların konsolidasiyası barədə qərar müvafiq icra hakimiyyəti orqanının müəyyən etdiyi orqanın (qurumun) yaratdığı komissiya tərəfindən qəbul ediləcək. Komissiyanın qərarı ilə kənd təsərrüfatı təyinatlı torpaqların konsolidasiyasına dair bölgü sənədi təsdiq olunacaq. Bölgü sənədi konsolidasiya layihəsinin icrası nəticəsində torpaq sahələrinin sərhədlərinə, ölçülərinə, yerləşməsinə, həmin torpaq sahələri üzərində mülkiyyət və digər əşya hüquqlarına dair məlumatları, eləcə də torpaq sahələri ilə bağlı digər dəyişikliklər barədə məlumatları özündə ehtiva edəcək və daşınmaz əmlak üzərində hüquqların dövlət qeydiyyatı üçün əsas hesab olunacaq.
Kənd təsərrüfatı təyinatlı torpaqların konsolidasiyası qaydası müvafiq icra hakimiyyəti orqanının müəyyən etdiyi orqan (qurum) tərəfindən müəyyən ediləcək.
