Məişət zorakılığı ilə bağlı məlumat bankına daxil olan məlumatların təhlilinə görə, ötən il yarım ərzində Azərbaycanda məişət zorakılığına məruz qalan insanların 85,5 faizi qadınlar, 14,5 faizi kişilər olub.
Oxu.Az xəbər verir ki, bunu Trend-ə Ailə, Qadın və Uşaq Problemləri üzrə Dövlət Komitəsinin İnformasiya və analitik araşdırmalar şöbəsinin müdiri Elgün Səfərov deyib.
Məişət zorakılığı ilə bağlı məlumat bankının 2015-ci ildə yaradıldığını xatırladan E.Səfərov qeyd edib ki, 2015-ci ildə banka 346, 2016-cı ilin I yarısında 184 fakt daxil edilib. Ümumilikdə, banka daxil olan 530 məişət zorakılığı faktı təhlil olunub və müəyyən edilib ki, məişət zorakılığına məruz qalan kişilərin 9,2 faizi yetkinlik yaşına çatmayan oğlanlar, 3,2 faizi qocalar, 2,1 faizi isə 25-45 yaşlı kişilərdir:
“Azərbaycanda fərqli yanaşmalar var ki, kişilər də fiziki zorakılığa məruz qalırlar? Lakin burada yalnız nikahda olan qadınla kişi arasındakı zorakılıqdan söhbət getmir. Ola bilər ki, kişiyə qarşı ailə üzvləri tərəfindən zorakılıq törədilsin. Ola da bilər ki, qohumluq münasibəti olmayan şəxslər birgə yaşayırlar, onların məişət şəraitləri birgədir və bu zəmində də zorakılıq törədilir”.
E.Səfərov qeyd edib ki, kişilərə qarşı daha çox psixoloji zorakılıq törədilir:
“Bu zorakılıq ailə üzvləri tərəfindən törədilə bilər - kişi kişiyə qarşı, qadın kişiyə qarşı və s. ola bilər. Fiziki zorakılıq isə daha çox kişilər tərəfindən qadınlara qarşı törədilir. Amma “qadınlar zorakılıq faktı törətmir” fikri də yanlışdır. Komitənin fəaliyyət göstərdiyi müddət ərzində elə qətl faktları olub ki, onlar qadınlar tərəfindən kişilərə qarşı törədilib”.
E.Səfərov qeyd edib ki, Azərbaycanda fiziki zorakılığa məruz qalanlar arasında 25-34 yaşlı kişilərin sayı çox azdır. Bu yaşda olan kişilər əsasən psixoloji zorakılığa məruz qalanlardır.
Komitə rəsmisinin sözlərinə görə, fiziki zorakılıqla bağlı məlumatların öyrənilməsi çox asandır. Amma 99 faiz psixoloji və seksual zorakılıq halları ilə bağlı müraciət daxil olmur. Zorakılığa məruz qalan əksər insanlar dövlət orqanlarına müraciət edəndə bəzi məsələlərin bağlı qalmasını istəyirlər:
“Ümumiyyətlə, deyə bilərik ki, bizə zorakılıqla bağlı edilən müraciətlərin 90 faizini fiziki zorakılıq təşkil edir. Ya da belə olur ki, fiziki zorakılıq iqtisadi zorakılıqla, cinsi zorakılıqla birgə törədilir”.
Məişət zorakılığını törədən insanların sosial statusu və peşəsini də açıqlayan E.Səfərov bildirib ki, məişət zorakılığını törədən şəxslərin 40,3 faizi işsiz insanlar, 34 faizi fəhlə, 1 faizi müəllim, 22,7 faizi fərdi əməklə məşğul olanlar, 2 faizi təqaüdçülərdir. Məişət zorakılığını törədən şəxslərin 91,9 faizi orta, 3,2 faizi ilk peşə ixtisas, 3,8 faizi orta ixtisas, 1,1 faizi ali təhsillidir. Məişət zorakılığına ən çox məruz qalanlar valideyn himayəsindən məhrum olan uşaqlar və evdar qadınlardır. Məişət zorakılığına məruz qalan şəxslərin 74,3 faizi evli, 25,7 faizi subaydır.
A.M.
