Bu gün Azərbaycanın Milli Qəhrəmanı, təyyarə kapitanı İqor İvanoviç Kşnyakinin anadan olmasının 63-cü ildönümü tamam olur.
Oxu.Az xatırladır ki, o, 1962-ci ildə Bakı şəhərində doğulub.
Pilot ixtisası üzrə ilk təhsilini 1982-ci ildə Ryazan vilayətində Sovet İttifaqı Qəhrəmanı Qriqori Taran adına Sasovo Mülki Aviasiya uçuş məktəbində alıb. Həmçinin 1992-ci ildə Rusiya Dövlət Hidrometeoroloji İnstitutunun Meteorologiya fakültəsini bitirib.
1982-ci ildə Yevlax Birləşmiş Aviasiya Dəstəsinin "An-2" təyyarəsinin 2-ci pilotu vəzifəsində əmək fəaliyyətinə başlayıb.
1984-cü il yanvarın 6-dan Zabrat Birləşmiş Aviasiya Dəstəsinin "An-2" təyyarəsinin 2-ci pilotu, 1990-cı ildə Azərbaycan Mülki Aviasiya İdarəsinin "Yak-40" hava gəmisinin 2-ci pilotu vəzifələrində çalışıb. 1994-cü ildə "Yak-40" hava gəmisinin komandiri, 1997-ci ildə Azərbaycan Hava Yollarının (AZAL) "Yak-40" hava gəmisinin kapitanı vəzifəsinə təyin edilib. 1998-ci ildə "Tu-134" hava gəmisinin 2-ci pilotu vəzifəsinə təyin olunur. 2005-ci ildə "An-140" təyyarəsinin kapitanı, 2008-ci ildən etibarən "ATR-42/72" hava gəmisinin kapitanı vəzifəsinə yüksəldilir.
2013-cü il iyunun 3-dən etibarən "Embraer-170/190" təyyarəsi üzrə yenidən təlim kursunu bitirdikdən sonra onun stajçı pilotu vəzifəsinə keçirilib. 2013-cü dekabrın 11-dən etibarən "Azərbaycan Hava Yolları" QSC-nin Uçuşların İstehsalı İdarəsinin Uçuş Xidmətində "Embraer-170/190" təyyarəsinin kapitanı vəzifəsinə təyin edilir.
2020-ci ildə Bakıdan Moskvaya uçarkən Kşnyakinin komandiri olduğu təyyarədə olan sərnişinlərdən birinin halı pisləşib. Kşnyakin təcili eniş edib və sərnişinin həyatı xilas olunub.
Kşnyakinin 15 139 saatlıq uçuş təcrübəsi var idi ki, bunun 11 180 saatı kapitan kimi həyata keçmişdi. Onun da 7 009 saatdan çoxu "Embraer 190" təyyarəsində olub.
Bir oğlu və üç qız övladı var.
O, 2024-cü il dekabrın 25-də "Azərbaycan Hava Yolları" aviaşirkətinin J2-8243 nömrəli Bakı-Qroznı reysini yerinə yetirən "Embraer 190" təyyarəsinin kapitanı olub. Təyyarə Rusiya hava məkanında vurulub və Aktau şəhəri yaxınlığında qəzaya uğrayıb. Təyyarənin göyərtəsində 67 nəfər olub: 62 sərnişin və 5 ekipaj üzvü. Qəza nəticəsində 29 nəfər sağ qalıb.
İqor Kşnyakin, təyyarənin ikinci pilotu və bir ekipaj üzvü, habelə 35 sərnişin qəza zamanı həyatını itirib. Ekspertlər o və komandası haqqında "tarixə qəhrəmanlar kimi düşüblər" ifadəsini işlədiblər.
29 dekabr 2024-cü ildə II Fəxri xiyabanda dəfn olunub.
Azərbaycan Respublikası Prezidentinin 29 dekabr 2024-cü il tarixli sərəncamı ilə Kşnyakin İqor İvanoviç ölümündən sonra "Azərbaycanın Milli Qəhrəmanı" adına layiq görülüb. Ölümündən sonra "Qızıl Ulduz" medalı ilə təltif olunub.
