Bu ay Bakı şəhərində özünə qəsd hadisələrinin sayı açıqlanıb.
Oxu.Az APA-ya istinadən xəbər verir ki, Bakı Şəhər Təcili və Təxirəsalınmaz Tibbi Yardım Stansiyasının Operativ işlər üzrə şöbəsinin böyük həkimi Zemfira Vahidova deyib ki, yanvar ayı ərzində 25 özünə qəsd hadisəsi baş verib.
Onun sözlərinə görə, özünə qəsd edənlərdən 6 nəfərin həyatını xilas etmək mümkün olmayıb:
“Yanvar ayı ərzində 6 nəfər - 4 qadın, 2 kişi özünü asıb. Hadisələrin hamısı ölümlə nəticələnib. 1 nəfər özünü bıçaqlayıb, o, xəstəxanaya çatdırılıb. 1 qadın özünü dənizə atıb, onu xilas etmək mümkün olub. 17 nəfər isə özünü zəhərləyib. Bunlardan 2-si sirkə turşusu, 15 nəfər isə dərmanla zəhərlənmədir. Onların arasında ölən yoxdur, hamısı xəstəxanaya yerləşdirilib”.
Z.Vahidova qeyd edib ki, özünə qəsdlərin səbəbi onlara məlum deyil:
“Bunun səbəbi bizə məlum deyil. Bizim borcumuz xəstəyə ilk yardım etmək, xəstəxanaya çatdırmaq, ölüm olduğu halda, bu barədə polisə məlumat verməkdir”.
