"WUF13 tədbirinə böyük sayda insanın qatılması həm qlobal iştirakın miqyasını, həm də qarşımızda duran məsuliyyətin nə dərəcədə nəhəng olduğunu əks etdirir".
Oxu.Az-ın məlumatına görə, bu sözləri Birləşmiş Millətlər Təşkilatının (BMT) Baş Assambleyasının sədri Annalena Berbok Ümumdünya Şəhərsalma Forumunun 13-cü sessiyasının (WUF13) rəsmi açılışına göndərdiyi videomüraciətdə qeyd edib.
"Gəlin etiraf edək: bu miqyasda olan bir böhranın bəsit həll yolları mövcud deyil. Daha çox mənzilin inşa edilməsi mütləqdir, lakin təkcə bu addım kifayət etməyəcək. Yaşayış yerlərini yaxşılaşdırmaq üçün infrastruktur, təməl xidmətlər, iqlim dəyişikliyinə qarşı dözümlülük, maliyyələşmə və inklüziv planlaşdırma ilə əlaqələndirən kompleks yanaşma tələb olunur.
Davamlı şəhər inkişafı, sadəcə, hökumətlərin səyləri ilə baş tuta bilməyəcəyi üçün bu yanaşma genişmiqyaslı iştirakçılıq tələb edir. Bu məqsədlə yerli idarəetmə orqanlarının, icmaların, vətəndaş cəmiyyətlərinin, özəl sektorun, mütəxəssislərin və xüsusilə də məskunlaşdıqları şəhərlərin qurulmasında birbaşa iştirak etməli olan vətəndaşların birgə fəaliyyəti zəruridir.
İnsanlar, sadəcə, inkişaf prosesinin nəticələrindən bəhrələnən kütlə kimi deyil, bu prosesin aktiv hərəkətverici qüvvəsi kimi qəbul edilməlidir. Bu müstəvidə Yeni Şəhər Gündəliyi bizim əsas ortaq bələdçimiz hesab olunur. Həmin sənədin inklüziv, təhlükəsiz, davamlı və insanyönümlü şəhərlərə yönəlmiş hədəfləri on il bundan öncə qəbul edildiyi zamandakı qədər müasir dövrdə də öz aktuallığını qoruyur.
Cari ilin iyul ayında Baş Assambleya tərəfindən Yeni Şəhər Gündəliyinin aralıq yekunlarına həsr edilmiş ikigünlük ali səviyyəli görüş təşkil olunacaq. İnanıram ki, WUF13 platformasındakı müzakirələriniz dərin məzmunlu, inklüziv və tətbiqi xarakter daşıyacaq, həmçinin Nyu-Yorkda qəbul ediləcək siyasi bəyannamə ilə bağlı danışıqların hazırlıq prosesinə töhfə verəcək", - deyə o əlavə edib.
