Biri deyir, birinci zolaqdan dön, o biri deyir, kənara olmaz, ikincidən dön: Nişanlanmada ZİDDİYYƏT

Bakı küçələrində aparılan xətlənmələrin ziddiyyətli olması sürücüləri çaş-baş qoyub.

Bununla bağlı Oxu.Az-a müraciət edən sürücü bildirib ki, xətlənmənin eyni tələbi hər küçədə fərqli şəkildə tətbiq olunur.

"30 ilin sürücüsüyəm. Bilirik ki, sağa və ya sola dönmə edəndə, təhlükəsizlik üçün əvvəlcə döngəyə ən yaxın zolağı tutmaq, sonra dönmə etmək lazımdır. Əgər birinci zolaq düzünə gedirsə, birbaşa ikinci zolaqdan sağa dönmə etmək olmaz. Təhlükəlidir.

Amma şəhərin yeni xətlənmələrindən baş açmaq mümkün deyil. Çünki elə küçələr var ki, birinci zolaq düzünə getməyi tələb etdiyi halda, ikinci zolaqdan sağa dönmə işarəsi qoyulub. Ad da qoyurlar ki, bu, avtobus zolağıdır, ora girib dönmə etmək olmaz. Əgər qaydalar dəyişibsə, o zaman niyə hər küçədə bir cür xətlənmə edilib?" - deyə vətəndaş soruşur.

Vətəndaş nişanlanmada ziddiyyət olan küçələr barədə bildirib:

"Məsələn, şəhərin mərkəzində, Nizami metrosunun da yerləşdiyi, Cəfər Cabbarlı küçəsində yerdəki nişanlanma tələb edir ki, birinci zolaq düzünə getməyi əmr etdiyi halda, biz ikinci zolaqdan və düz döngənin ağzına çatanda, yəni yolun tən ortasından, dönmə edək. Azadlıq prospektində isə, nişanlanma həmişəki tələb əsasındadır, yəni əvvəlcə birinci zolağa keçirsən və dönürsən. Baxmayaraq ki, o prospekt də təzə xətlənib. Avtobus zolaqlarının çəkilməsi anlaşılandır, amma nəzərə almaq lazım idi ki, C.Cabbarlı küçəsi də Azadlıq prospekti kimi nəqliyyatın intensiv hərəkət etdiyi yerdir. Əgər bu küçədə dönmə zamanı qəza baş versə, bunun məsuliyyətini kim daşıyacaq?" - deyə şikayətçi sual verib.

Şikayətçinin sualı əsasında Azərbaycan Yerüstü Nəqliyyat Agentliyinə (AYNA) sorğu ünvanladıq.

Qurumun Mətbuat Xidmətindən Oxu.Az-ın sorğusuna cavab olaraq bildirilib ki, xətlənmələr aidiyyəti dövlət qurumları ilə razılaşdırılaraq çəkilib.

"Avtobusla sərnişin daşımaları şəhərdə mobilliliyin təmin edilməsi baxımından böyük əhəmiyyətə malikdir. İctimai nəqliyyat hərəkət cədvəlinə uyğun fəaliyyət göstərir, onun tıxacda qalması və ləngiməsi bütün xətt boyunca intervalların pozulmasına gətirib çıxarır.

Xüsusi avtobus zolaqları daha çox sərnişinin daşınmasına imkan yaradır. Hazırda paytaxtın 24 küçə və prospektində uzunluğu 75 km-dən çox xüsusi hərəkət zolaqları təşkil edilib.

Cəfər Cabbarlı küçəsində də aidiyyəti dövlət qurumları ilə razılaşdırılaraq çəkilən xüsusi zolaq avtobusların fasiləsiz və intensiv hərəkətini təmin edir. Digər nəqliyyat vasitələrinin sağa dönməsinə məhz kəsişmələrdə icazə verilməsində məqsəd ictimai nəqliyyatın üstünlüyünün və davamlı hərəkətinin təmin olunmasıdır. Bu küçədən kəsişmələrdə sağa dönmək istəyən nəqliyyat vasitələri avtobuslara yol verərək bilavasitə kəsişmədə 2-ci zolaqdan sağa dönə bilərlər və bu qanunvericiliyə uyğundur", - deyə açıqlamada bildirilir.

Əzizə İsmayılova