Cavid Ələkbərov: "Hekayəsi ilə böyüdüyümüz əmimizi biz bu gün torpağa tapşırdıq"

"Hekayəsi ilə böyüdüyümüz əmimizi biz bu gün torpağa tapşırdıq".

Oxu.Az xəbər verir ki, bunu şəhid əmisinin adını daşıyan Cavid Ələkbərov deyib.

"Allah Ordumuzu qorusun. Mən əmimin adını daşıyıram və Vətən müharibəsi iştirakçısıyam. Ali məqam bizə qismət olmadı, amma biz şəhidlərin açdığı cığırla gedirik. Allah bütün şəhidlərimizə rəhmət eləsin! Mənim əmim Murovdağ istiqamətində döyüşüb. Bu gün ürəyimiz rahatdır, artıq Şəhidlər xiyabanında əmimizi ziyarət edəcəyimiz bir yerimiz var", - C.Ələkbərov qeyd edib.

Xatırladaq ki, Birinci Qarabağ döyüşlərində şəhid olmuş, 30 il sonra kimliyi müəyyənləşdirilmiş Cavid Fazil oğlu Ələkbərov bu gün Sumqayıt şəhər Şəhidlər xiyabanında torpağa tapşırılıb.

Şəhid Cavid Fazil oğlu Ələkbərov 1975-ci il aprelin 25-də Qubadlı rayonunun Novlu kəndində anadan olub. 1993-cü ildə Milli Ordu sıralarında həqiqi hərbi xidmətə çağırılıb. Şəhid Cavid Ələkbərov Kəlbəcərdə, Murovdağ və ətraf yüksəkliklər uğrunda gedən şiddətli döyüşlərdə iştirak edib. Məlumatlara görə, şəhidimizin son döyüşü 1994-cü il fevralın 16-da Murovdağ yüksəkliyi istiqamətində olub.

Könül Cəfərli