Dostları aktyor Ənvər Həsənovu kino aləminə göndərilən "VERGİ" adlandırdılar

"Ənvər bir evdən yox, bir eldən gedən sənətkardır".

Bu sözləri Oxu.Az-a Xalq artisti Ənvər Həsənovun 40 mərasimində Xalq artisti Ənvər Həsənovun dostu, yazıçı publisist Əlizaman Yelmaroğlu deyib.

O bildirib ki, Ənvər Həsənov Azərbaycan mədəniyyətinə və kinosuna kifayət qədər töhfə vermiş bir şəxsdir:

"Ənvər mənim üçün çox əziz adam olub. Aramızda çox səmimi dostluq var idi. Bizim dostluğumuz duz-çörəkdən keçib. O, yaşca məndən çox böyük olsa da, amma hər zaman mənə sirdaş olub.

Ənvər bir evdən getmədi, eldən gedən sənətkar oldu. Onun sədaqətindən, dostluğundan, xüsusi keyfiyyətlərindən çox danışmaq olar. Ənvər haqqında saysız qələm lazımdır ki, onu yazıb bitirəsən".

Əlizaman Yelmaroğlu Ənvər Həsənovun son günləri barədə də məlumat verib:

"Hər gün bizim telefon əlaqəmiz olurdu. O, xəstəxanaya müalicə üçün yerləşdiriləndən sonra vəziyyəti pisləşdi. Ölümü də bir möcüzə oldu. 75 yaşı olacaqdı.

Həkimlər də deyirdilər ki, bədən cəhətdən çox sağlam adam idi. O, Qarabağ müharibəsini, Əfqanıstanı görmüşdü. Yalnız kinoşünas deyildi, həm də real bir vətəndaş, xalqını, elini, millətini sevən biri idi".

Kinoaktyor Rafiq Əzimov hesab edir ki, Ənvər Həsənov kino aləminə bir vergi idi:

"Kino aləminə gəlişini öz dilindən belə eşitmişəm: rəhmətlik Arif Babayev onu uşaq yaşlarında İçərişəhərdə görüb bəyənmiş və sənətə gəlməyə tövsiyə etmişdi. Ənvərin bir Firuz adlı qohumu da, anasına "Ənvər gözəl, göyçək oğlandı, kinoaktyorluq məktəbinə getsin" deyə məsləhət verib. O vaxt Ənvərin cəmi 14 yaşı var idi. Hökumət Evində yerləşən kinoaktyor məktəbinə ərizə yazıb, müraciət etdi. Adil İsgəndərov, Mehdi Məmmədov, Hökümə Qurbanova, Leyla Bədirbəyli kimi böyük sənətkarlar ondan imtahan götürüb. İlk dəfə müraciət edənlər arasında 852 nəfər vardı. İmtahanlardan sonra dedilər ki, üç günə siyahı asılacaq. İmtahandan sonra onlardan 53 nəfəri qaldı. Ənvər deyirdi ki, siyahıda adını gördükdə, elə bil bütün dünya ona bağışlanmışdı. İki il yarım burada dərs aldı. O vaxt hələ yeni kinostudiya açılmamışdı, köhnə kinostudiya fəaliyyət göstərirdi. Burada böyük sənətkarların çəkilişlərinə həm assistent, həm də ədəbi köməkçi və rejissor köməkçisi kimi qatıldı. Ustad müəllimlərdən dərs alaraq sənətin zirvəsinə doğru irəlilədi. Ənvərin kino aləmində tanınmasında Arif Babayevin çəkdiyi "Uşaqlığın Son Gecəsi" filmi mühüm rol oynadı. Bu filmdə o, "Murad" obrazını canlandırdı. Hətta Ənvər Murad adını nəvəsinə vermişdi. Ondan əvvəl "Səma dənizi" filmində də həm assistent, həm aktyor kimi fəaliyyət göstərmişdi, amma onu tanıdan məhz "Murad" obrazı oldu".

O, Ənvər Həsənovun həyatına ayrıca bir film çəkməyin mümkün olduğunu söyləyib:

"Biz Ənvəri "ceyran" adlandırırdıq. "Yeddi Oğul İstərəm" filmində Cəlal obrazını canlandıranda da, həqiqətən, at çapmaqda və ölüm səhnələrində fərqlənmişdi. İki dəfə ölümdən dönüb. Bir dəfə at çaparkən təhlükə zamanı işıqçı Akif onu xilas etmişdi.

Ənvər, həqiqətən də böyük bir sənətkar idi. Son illərdə bir qədər əziyyət çəkirdi, düşünürdü ki, bəlkə də layiq olduğu qiyməti almır. Amma şükürlər olsun ki, dövlətimiz və hörmətli Prezidentimiz İlham Əliyev onun sənətini qiymətləndirdi. O, Xalq artisti adı aldı və Prezident təqaüdü ilə mükafatlandırıldı.

Təəssüf ki, bu qiymətə daha uzun müddət sevinə bilmədi".

Aygün Mirakif