Ukraynanın Odessa sahilləri yaxınlığında Türkiyənin "Okean Maritime" şirkətinə məxsus və içərisində 11 nəfər azərbaycanlı olan "Atlas Bey" mülki ticarət gəmisi dron hücumuna məruz qalıb. Hücumdan sonra kapitan istisna olmaqla digər ekipaj üzvləri Odessa şəhərində sahilə çıxarılıblar.
Oxu.Az "Qafqazinfo"ya istinadən xəbər verir ki, Dənizçilərin İctimai Birliyinin sədri İlham Nəsirov gəminin kapitanı Səməd Nəsrullayevin həlak olduğunu bildirib.
Birlik sədri öz vəzifə borcunu yerinə yetirərkən amansız hücumun qurbanı olan kapitanın yaxınlarına başsağlığı verib.
Qeyd edək ki, Azərbaycan Xarici İşlər Nazirliyi (XİN) də hücum barədə açıqlama yayıb. Məlumatda xilas edilən ekipaj üzvlərinin vəziyyətinin qənaətbəxş olduğu, kapitanın axtarışı istiqamətində tədbirlər görüldüyü qeyd edilib.
