"Elm və Təhsil Nazirliyinin 60 xidmətinin "MyGov" platformasına inteqrasiya planlaşdırılır".
Oxu.Az xəbər verir ki, bunu Elm və Təhsil Nazirliyinin Təhsil Sisteminin İnformasiyalaşdırılması İdarəsinin baş informasiya direktoru Vüsal Xanlarov İqtisadi İslahatların Təhlili və Kommunikasiya Mərkəzində (İİTKM) "Rəqəmsal arxitektura: Proqram idarəetməsi və nəticəəsaslı yanaşma" mövzusunda keçirilən dəyirmi masada deyib.
O bildirib ki, hazırda səkkiz xidmət "MyGov"a inteqrasiya olunub və bu, 400 min istifadəçini əhatə edir:
"Digər xidmətlərin də "MyGov"a inteqrasiyası ilə platforma daha çox insan üçün əlçatan olacaq".
Vüsal Xanlarov əlavə edib ki, təhsil sahəsində verilən sənədlər elektron formada vətəndaşlara təqdim olunacaq:
"Artıq bu prosesə başlanıb. Peşə təhsili haqqında olan diplomlar elektron formada təqdim edilib. Çox yaxın günlərdə elektron diplom, sertifikatlar "MyGov" platformasında əlçatan olacaq".
