Emin Əmrullayev: "Yeni sahə meydana gələn kimi onun adına uyğun ixtisas olması heç nəyi həll etmir"

"Azərbaycanın yaşıl enerjiyə keçidinin və COP29-un ölkəmizdə keçirilməsinin önəmli olduğunu düşünürəm. Çünki bu, həm iqtisadi, həm də gündəlik həyatda müəyyən davranış fərqliliyinə gətirir. Düşünürəm ki, bunu təhsil vasitəsilə dəyişə bilərik".

Oxu.Az xəbər verir ki, bunu "Yaşıl artım gündəliyində təhsil" mövzusunda keçirilən konfransda çıxışı zamanı elm və təhsil naziri Emin Əmrullayev deyib.

O bildirib ki, bu məsələ bir neçə istiqamətdə özünü göstərir:

"Birinci məqam - vətəndaşın məsələyə səriştəli yanaşmasıdır. İkincisi isə, bacarıqlardır ki, bu da təhsil ilə əlaqəlidir. Səriştəsizin yanında duran da bacarıqlardır ki, həm peşə, həm də ali təhsil sistemində özünü büruzə verir. Üçüncü istiqamət isə - daha çox elm və innovasiya ilə əlaqəlidir. Bu məqamda növbəti illərdə biz milli təhsil sistemi olaraq innovasiyalardan kənarda qalmamalıyıq".

Nazir onu da əlavə edib ki, yeni sahə yaranan və aktuallaşan zaman dərhal o ada uyğun ixtisas yaradaraq təhsil sisteminə əlavə etməyə çalışırıq:

"Hesab edirlər ki, təhsil sisteminə yeni ixtisasın əlavə edilməsi ilə problemlər həllini tapacaq. Təbii ki, yeni ixtisaslara hər zaman ehtiyac var. Xüsusilə də tətbiqi sahədə yeni ixtisaslar açılmalıdır. Lakin anlamalıyıq ki, yaşıl iqtisadiyyat və ya bərpa olunan enerji, eləcə də bu kimi mövzuları daha yaxşı təqdim etmək üçün sadəcə fundamental elmlərə düzgün yanaşma lazımdır.

Bunun kökündə dayanan fənlər - kimya, fizika, riyaziyyatdır. Yeni sahə meydana gələn kimi onun adına uyğun yeni ixtisas açılması hər şeyi həll etmir. Məsələnin kökü öyrənilməlidir. Təhsil ictimaiyyəti olaraq yeni ixtisaslara üstünlük verilməlidir. Yeni ixtiralardan, yeni sahələrdən danışırıqsa, onun kökündə dayanan elmləri öyrənmək lazımdır. Bəzi ixtisasları əhatə edəcək fundamental fənlər elmi cəhətdən daha dərindən öyrənilməlidir".

Daha çox foto burada: PhotoStock.az

Könül Cəfərli