"Ağdam Avtovağzal və Dəmiryol Vağzalının digər özəlliyi ondan ibarətdir ki, ölkədə ilk dəfə olaraq qatar daxili platformaya daxil olur".
Oxu.Az-ın Ağdama ezam olunmuş əməkdaşı xəbər verir ki, bunu Qarabağ iqtisadi rayonuna daxil olan işğaldan azad edilmiş ərazilərdə (Şuşa rayonu istisna olmaqla) Prezidentin xüsusi nümayəndəsi Emin Hüseynov jurnalistlərə açıqlamasında bildirib.
Onun sözlərinə görə, bu gün Bakı-Ağdam qatarı 32 illik fasilədən sonra ilk dəfə fəaliyyətə başlayıb:
"Bu ilk qatarın fəaliyyətə başlaması həm də azad edilmiş ərazilərə Böyük Qayıdışın çox vacib bir simvoludur".
"Ağdam Avtovağzal və Dəmiryol Vağzalının digər özəlliyi ondan ibarətdir ki, ölkədə ilk dəfə olaraq qatar daxili, qapalı platformaya daxil olur. Burada qapalı perron var və bu da hava şəraitindən asılı olmayaraq sərnişinlərin istənilən vaxt vağzalda qəbul olmasına şərait yaradacaq. Artıq Ağdamdan azad edilmiş digər ərazilərə avtobus reyslərinin açılması ilə bağlı Rəqəmsal İnkişaf və Nəqliyyat Nazirliyi tərəfindən müvafiq işlər aparılır", - deyə E.Hüseynov əlavə edib.
Mərahim Nəsib
