Azərbaycanda məmurun mükafatlandırılması mərasimi sosial şəbəkələrdə geniş müzakirələrə səbəb olub.
Oxu.Az xəbər verir ki, bununla bağlı görüntülər yayılıb.
Videoda kimliyi açıqlanmayan şəxs "Azərbaycan Respublikasının Milli Məclisinin informasiya portalının direktoru Fəridə xanımın", həmçinin ölkə Prezidentinin adından Gədəbəy rayonunda Kommunal Müəssisələri Kombinatının direktor əvəzi Ruslan Mustafayevə "fəxri diplom" təqdim edir.
"Baxmayaraq ki, iki aydır direktor əvəzidir, rayonumuzda göstərdiyi fəaliyyətə və analoqu olmayan təmizlik işlərinə görə onu təbrik edirəm", - şəxs əlavə edir.
Videodan görünür ki, mərasimdə direktor əvəzi tək deyil, o, işçilərini də tədbirə dəvət edib. İşçilər Ruslan Mustafayevin mükafat almasını alqışlarla qarşılayıblar.
Maraqlıdır ki, iki fərqli instansiyanın niyə bir "fəxri diplom" göndərməsi, eləcə də "MM-in informasiya portalı" kimi bir resursun mövcud olub-olmadığı nə məmurun, nə də otaqdakı digər tədbir iştirakçılarının ağlına gəlir.
Qeyd edək ki, məsələ ilə bağlı aidiyyəti üzrə sorğu verilib.
