"Gəncə şəhərində xəstəxanada öldüyü və meyitinin gizlədildiyi iddia olunan gənc yaşayır".
Oxu.Az xəbər verir ki, bunu "Teleqraf"a açıqlamasında xəstənin müalicə olunduğu "DNK - İstanbul Hospital"ın anestezioloqu Murad Musayev bildirib.
Onun sözlərinə görə, 36 yaşlı Ayaz Məmmədovun müalicəsi davam edir, nəbzi 136, saturasiyası 100, təzyiqi isə 132\85-dir. Həkim deyib ki, A.Məmmədovun yaxınlarının iddiası əsassızdır:
"Yuxarıda sadaladığım göstəricilər qeydə alındığı və xəstənin yaşadığı bir vəziyyətdə onu aparatdan ayırmaq həm cinayətdir, həm də vicdani olaraq mümkün deyil. Son ürək döyüntüsünə qədər süni tənəffüs aparatına bağlı olmalıdır".
M.Musayev söyləyib ki, ötən gün xəstənin yaxınları ilə görüşüblər, bütün məsələlər aydın formada izah olunub: "Onlara deyilib ki, bu müddətdə əlavə ödəniş alınmayacaq".
Qeyd edək ki, iyulun 24-də A.Məmmədov yolu keçərkən "Mercedes-Benz" markalı avtomobil onu vurub. Nəticədə o, kəllə-beyin travması alıb və "DNK - İstanbul Hospital" özəl klinikasına yerləşdirilib.
Yaxınları isə iddia edirlər ki, A.Məmmədov vəfat edib. Sadəcə xəstəxana əlavə pul almaq üçün onu süni nəfəs aparatından ayırmır.
