Azərbaycanda həm nikahların, həm də boşanmaların sayı azalıb. Dövlət Statistika Komitəsinin məlumatına görə, cari ilin yanvar-avqust aylarında ölkədə 26 485 nikah və 13 278 boşanma qeydə alınıb. Ötən ilin eyni dövrü ilə müqayisədə hər min nəfərə düşən nikahların sayı 4.6-dan 3.9-a, boşanmaların sayı isə 2-dən 1.9-a enib.
Oxu.Az Baku TV-yə istinadən xəbər verir ki, iqtisad elmləri doktoru Rəsmiyyə Abdullayeva nikahların sayının azalmasına təsir göstərən əsas amillərdən birinin sosial-iqtisadi çətinliklər olduğunu bildirib.
Onun sözlərinə görə, gənclərin karyera qurmağa daha çox vaxt ayırması, sabit iş yerinin olmaması və mənzil təminatı ilə bağlı problemlər ailə qurmaq qərarını gecikdirir.
R.Abdullayeva vurğulayıb ki, nikahların sayında uzunmüddətli azalmanın davam etməsi ölkənin demoqrafik vəziyyətinə də mənfi təsir göstərə bilər. Onun fikrincə, doğum səviyyəsinin aşağı düşməsi gələcəkdə əmək qabiliyyətli əhalinin azalmasına, pensiya sisteminə düşən yükün isə artmasına səbəb ola bilər.
Ekspert problemin həlli üçün gənc ailələrə dövlət dəstəyinin gücləndirilməsini vacib hesab edir. O, xüsusilə mənzil təminatı və ipoteka kreditləri üzrə daha əlçatan güzəşt mexanizmlərinin tətbiqini təklif edib.
