Mələknaz Yusifova: "İstedadlı gənclərə "Global Media Group"a yönəlməkdə yaşıl işıq yandıra bilərik"

"Bu sərgi tələbə və məzunların əmək bazarına çıxışına, karyera imkanlarının artırılmasına, gənclərin, işəgötürənlərlə ilkin əlaqələr qurmalarına şərait yaradır. Bizim üçün də sərginin mahiyyəti böyükdür. İstedadlı, potensiallı gənclərin şirkətimizə yönəlməsi üçün "yaşıl işıq" yandıra bilərik".

Bu fikirləri Oxu.Az-a açıqlamasında "Global Media Group" MMC-nin İnsan resursları üzrə baş meneceri Mələknaz Yusifova Karyera Sərgisi 2025-də deyib.

Baş menecer bildirib ki, "Global Media Group" MMC ölkənin ən aparıcı media şirkətlərindən biridir:

"Savadına, bacarığına, peşəsinə və gördüyü işin keyfiyyətinə güvənən ixtisaslı kadrları biz daim diqqətdə saxlayırıq, əməkdaşlıq edirik. "Global Media Group"a Azərbaycanda və ölkə xaricində fəaliyyət göstərən televiziya kanalları, informasiya agentlikləri, xəbər portalları, qəzetlər və digər şirkətlər daxildir".

"Bizim şirkətin tərkibinə daxil olan - "Report" İnformasiya Agentliyi, Oxu.Az xəbər saytı, "Baku TV" yayım portalı və "Global Management" MMC autsorsinq şirkəti ISO-9001, ISO-14001 və ISO-45001 sertifikatlarına layiq görülüblər.

Sərgi həm də ingilis və rusdilli tələbələr üçün marketinq və kommunikasiya şöbələrində özlərinə uyğun mövqelərdə çıxış edə bilmələri baxımından faydalıdır. Məqsədimiz "Global Media Group"un tərkibində olan media məktəblərinə potensiallı gəncləri yönəldə bilməkdir. Bu, gənclərin həyatında vacib fürsət ola bilər", - deyə M.Yusifova qeyd edib.

Məhərrəm Əliyev