Sosial şəbəkədə metronun "20 Sentyabr" stansiyasının səsləndirməsinə aid olduğu bildirilən video yayılıb. Paylaşılan video müzakirələrə səbəb olub.
"Bakı Metropoliteni" Qapalı Səhmdar Cəmiyyətinin İctimaiyyətlə əlaqələr şöbəsinin müdiri Bəxtiyar Məmmədov məsələ ilə bağlı Oxu.Az-a açıqlamasında bildirib ki, yayılan səsləndirmə quruma aid deyil.
Bəxtiyar Məmmədov "20 Sentyabr" stansiyasında tikinti işlərinin planlı şəkildə davam etdirildiyini və hazırda son tamamlama mərhələsinin həyata keçirildiyini deyib.
Onun sözlərinə görə, stansiyada memarlıq işlərinə başlanılıb, infrastrukturun qurulması prosesi də davam edir.
Bəxtiyar Məmmədov əlavə edib ki, layihəyə əsasən, "20 Sentyabr" stansiyasında qatarlar istiqamətini dəyişərək əks istiqamətdə hərəkət edəcəklər:
"Bunun üçün stansiyanın arxasında ayrıca dönmə kamerası nəzərdə tutulmayıb. Belə bir qurğu layihəyə uyğun olaraq 8 Noyabr stansiyasının arxasında mövcuddur".
Xatırladaq ki, sentyabrın 4-ü Bakıda yeni metro stansiyasının "20 Sentyabr" adlandırılması ilə bağlı Azərbaycan Respublikasının Baş naziri Əli Əsədov qərar imzalayıb.
Qərara əsasən, 2023-cü il sentyabrın 20-də Azərbaycanın bütün ərazisində dövlət suverenliyinin bərpa olunması nəzərə alınaraq, Prezident İlham Əliyevin təşəbbüsü ilə Bakı Metropoliteninin Nəsimi rayonu, Cəlil Məmmədquluzadə küçəsi, 194 ünvanında yerləşən yeni stansiyasına "20 Sentyabr" adı verilib.
