Qusar xəstəxanasına vaxtı keçmiş dərmanlar verdiyi iddia edilən aptek işçisindən AÇIQLAMA

İddiaya görə, Qusar Rayon Mərkəzi Xəstəxanasının aptek bölməsinin əməkdaşı İlhamə Hacıyeva (onun həm də xəstəxana direktorunun həyat yoldaşı olduğu deyilir) tibb işçilərinə vatsap nömrəsi vasitəsilə vaxtı keçmiş dərmanların xəstələrə verilməsinə dair tapşırıq verib.

Həmçinin Qusar Rayon Mərkəzi Xəstəxanasında ötən il 23 nəfərin dünyasını dəyişdiyini də iddia edilib.

Oxu.Az xəbər verir ki, sözügedən qalmaqallarda adıçəkilən İlhamə Hacıyeva məsələ ilə bağlı Bizim.media-ya danışıb. O, deyib ki, paylaşılan yazışmalar qurmadır və düşmənçilik məqsədilə edilib:

"Adımı götürüb haradasa hallandırmaq mənim günahım deyil. Qusar xəstəxanasında belə bir şeyin olması sıfırın altındadır. Bu, xəstəxananın direktoru Kamil Hacıyevə qarşı qurulmuş təxribatdır və düşünülmüş, günlərlə qurulmuş plandır. Dəfələrlə belə hallar olub və bu da onun bir qoludur. Heç bir istinad mənbəyi olmayan bir məlumatdır. Özlərindən hər dəfə bir məlumat çıxarırlar və hər zaman da eyni adam paylaşır".

İlhamə Hacıyevanın sözlərinə görə xəstəxananın başına gətirilən müsibətlər bununla bitmir:

"Bu günə qədər bu xəstəxanaya gəlmiş bütün müdirlərə qarşı oynanılan oyunlardır. İndi də bu müdiriyyətə qarşı görülən tədbirlərdir. Məqsəd xəstəxananın rəhbərliyinə və tibb müəssisəsinin özünə xələl gətirməkdir. Çünki direktor heç kəsə rüşvət vermir və həkimlərin də rüşvət almasının qarşısını alır. Çoxlarına isə deyəsən bu, sərf eləmir".

Məsələ ilə bağlı hüquq mühafizə orqanlarına müraciət edib-etməyəcəyinə gəlincə, İlhamə Hacıyeva bir dəfə bununla bağlı müraciətlərinin olduğunu deyib:

"Bir dəfə müraciət etdik və xəstəxananın direktoruna qarşı iş açıldı. Nüfuzu isə yerlə-bir oldu. Ona görə də növbəti dəfə ora müraciət etməyi düşünmürük", - deyə aptek işçisi əlavə edib.

16:16

Qusar Rayon Mərkəzi Xəstəxanasında xəstələrə vaxtı keçmiş dərmanların verilməsi iddiası ilə bağlı sözügedən xəstəxanadan açıqlama verilib.

Bu barədə Oxu.Az-a açıqlama verən sözügedən xəstəxananın əməkdaşı bildirib ki, həmin iddialar araşdırılmayıb:

"Biz o barədə indi eşitmişik, hələ araşdırmamışıq. Heç bir məlumat verə bilmərik".

Qeyd edək ki, adı aptek bölməsinin əməkdaşı kimi hallanan İlhamə Hacıyevanın Qusar Rayon Mərkəzi Xəstəxanasında çalışıb-çalışmaması ilə bağlı sualımızı eşidən şəxs bizə cavab verməkdən imtina etdi.

14:56

Qusar Rayon Mərkəzi Xəstəxanasında xəstələrə vaxtı keçmiş dərmanların verildiyi iddia olunur.

Oxu.Az xəbər verir ki, məlumatı "Şimal xəbərləri"nin baş redaktoru Müqəddəs Mehdiyev paylaşıb.

O qeyd edib ki, xəstəxananın aptek bölməsinin əməkdaşı İlhamə Hacıyeva (o, həm də xəstəxana direktorunun həyat yoldaşıdır - red.) tibb işçilərinin "WhatsApp" qrupuna bu cür mesaj göndərib:

"Deməli, aptekdə vaxtı keçən dərman və sərfiyyatlar var. Bunlar şöbələrə paylanacaq".

"Bəzi məlumatlara görə, Qusar Rayon Mərkəzi Xəstəxanasında ötən il 23 nəfər dünyasını dəyişib. Deyilənə görə, bu, rekord göstəricidir. Hazırda Qusar Rayon Prokurorluğunda xəstəxanadan edilən bəzi müraciətlər əsasında araşdırmalar aparılır. Ümid edirik ki, bu "WhatsApp" yazışması da ciddi şəkildə yoxlanılacaq və həqiqət üzə çıxacaq", - deyə M.Mehdiyev əlavə edib.

Tibbi Ərazi Bölmələrini İdarəetmə Birliyinin (TƏBİB) Mətbuat Xidmətindən Oxu.Az-ın sorğusuna cavab olaraq qeyd edilib ki, sözügedən məsələ araşdırılır.

Məhərrəm Əliyev