Vətəndaşların yüksəkrütbəli polislərə müraciəti ilə bağlı yeniliyin təfərrüatı açıqlandı

"Vətəndaşlar müxtəlif məsələlərlə bağlı polis rəislərinə müraciət edə biləcəklər. Əgər müraciət DİN-ə aid olmasa, biz onu aidiyyəti qurumlara yönləndirəcəyik".

Bunu vətəndaşların polis rəislərinə birbaşa müraciəti ilə bağlı "e-polis"dəki yeni xidmətlə bağlı Oxu.Az-a açıqlamasında Daxili İşlər Nazirliyinin Mətbuat Xidmətinin rəhbəri Elşad Hacıyev deyib.

Onun sözlərinə görə, bu sistem polisə imkan verəcək ki, vətəndaşların qayğılarına, problemlərinə adekvat cavab versin:

"Sual yarana bilər ki, burada söhbət sahə rəislərindənmi gedir? Xeyr. Vətəndaşlar birbaşa rayon rəislərinə müraciət edə bilirlər. Yəni vətəndaş "e-polis" tətbiqi vasitəsilə birbaşa rəislərə müraciət edə və ya onların qəbuluna yazılaraq şikayətlərini çatdıra bilər. Vətəndaşlar əmin olmalıdırlar ki, birbaşa rəislərə müraciət etməklə həm də Daxili İşlər Nazirliyinin ərazilərdə nəzarətini təmin etmiş olurlar.

Məsələn, bir vətəndaş rayon polis rəisi ilə görüş üçün müraciət etdikdə biz sistemdə bunu görürük. Paralel olaraq, rayon polis rəisi də bizə bu müraciətlə bağlı xəbər verir. Hətta müraciətin necə sonlandığı barədə bizi məlumatlandırır. Bu bir nəzarət funksiyasıdır. Biz həm vətəndaşdan məlumat alırıq ki, müraciətiniz necə oldu, həm də polis rəisindən məlumat alırıq ki, vətəndaşın sizinlə görüşü necə keçdi? Eləcə də, hansı tədbirlər görüldü? Əgər bu müraciət bizə aid deyilsə, biz onu aidiyyəti qurumlara yönləndiririk".

"Bu, yeni bir sistemdir və effektivliyi artıracağına əminik. Hətta vətəndaşa probleminin həllinə dair istiqamətlər də verəcəyik. Vətəndaş çaşqınlıq içində qalmamalıdır. Bu sistemin yaxşı tərəflərindən biri də budur ki, vətəndaş müxtəlif məsələlər üzrə polisə müraciət edə biləcək. Əgər müraciət polis rəisinin səlahiyyətləri xaricindədirsə, o, DİN-in müvafiq strukturuna məruzə edəcək. Bilirsiniz ki, DİN əlçatanlığı səmərəli etmək üçün rəqəmsal istiqamətlərdə hər zaman yeniliklər edir. Bizim "e-polis" mobil tətbiqi vasitəsilə 31 adda xidmətimiz var", - E.Hacıyev qeyd edib.

DİN rəsmisi əlavə edib ki, sosial şəbəkələrdə çox yaxşı bir ənənə yaranıb: vətəndaşın bir problemi olanda qurumun "Facebook" profillərini işarələyirlər:

"Biz bütün bu müraciətlərə çox diqqətlə yanaşır, həllinə çalışırıq. Xüsusilə bunu qeyd etmək istəyirəm ki, vətəndaşın öz problemlərini DİN-ə çatdırma vasitələri var. "E-polis", sosial şəbəkələr, "102" xidməti - bütün bunlar vətəndaşların rahatlığı üçündür.

Əgər daxili işlər naziri bölgələrə gedib, yüzlərlə vətəndaşın problemləri ilə maraqlana bilirsə, ərazi rəisləri də vətəndaşlarla birbaşa təmasda olmalıdırlar. Heç bir müraciət etinasız qala bilməz. Ərazilərdə olan polis rəisləri, istintaq rəisləri, təhqiqat rəisləri artıq bilirlər ki, DİN-də nəzarət qaydasında prosesə müdaxilə edilə bilər.

Bir şeyi də vətəndaşlarımızın diqqətinə çatdırmaq istəyirəm ki, istənilən cinayət hadisəsində vətəndaş mundirsiz polis olmalıdır".

Xatırladaq ki, müraciətlərin operativ, obyektiv və həssaslıqla araşdırılması məqsədilə DİN-in rəsmi internet saytı və "e-polis" tətbiqində müvafiq bölmə yaradılıb.

Mobil tətbiqə daxil olaraq "Ana səhifə"dən "Qəbula yazıl" xidmətinə keçid edib qarşınıza çıxan müvafiq ardıcıllıqları yerinə yetirməklə müraciətinizi tamamlayırsınız.

Elçin Aslangil