İran parlamenti yol və şəhər inkişafı naziri Fərzanə Sadiqə qarşı impiçment proseduruna start verib. Buna səbəb kimi ölkənin cənubunda yerləşən Şəhid Rəcai limanında baş verən partlayışla bağlı səhlənkarlıq göstərilir.
Oxu.Az xəbər verir ki, bu barədə parlamentin abadlıq komitəsinin üzvü Məhəmməd Mənan Raisi "Tasnim" agentliyinə açıqlamasında məlumat verib.
Deputat bildirib ki, impiçmentə səbəb olan əsas amillər arasında Liman İdarəetmə Təşkilatının fəaliyyətsizliyi, mənzil qeydiyyatı proqramının dayandırılması ilə insanların qanuni hüquqlarından məhrum edilməsi, daşınmaz əmlak bazarına nəzarətdə zəiflik, təkrar qanun pozuntuları və texniki bilik çatışmazlığı yer alır.
Xatırladaq ki, aprelin 26-da Şəhid Rəcai limanında kimyəvi maddələr anbarında partlayış baş verib. Hadisə nəticəsində azı 70 nəfər həlak olub, 1.2 mindən çox insan xəsarət alıb. İran Daxili İşlər Nazirliyi hadisəni səhlənkarlıqla əlaqələndirir. İran tərəfi zərər çəkmiş ərazidə hərbi yüklərin olduğunu inkar edir.
