Ağdaş rayonunun Ləki inzibati ərazi dairəsinə daxil olan qəsəbə və kəndlərin sakinləri uzun müddətdir nəqliyyat və hərəkət imkanlarını məhdudlaşdıran ciddi problemlə üzləşiblər.
Oxu.Az-a müraciət edən sakinlərin iddialarına görə, Bakı-Qazax magistralının Yuxarı Ləki kəndindən keçən hissəsində inşa edilən yerüstü piyada keçidindən istifadə bir sıra səbəblərdən çətinləşib.
Belə ki, körpünün hündürlüyü, xüsusilə, yaşlılar, uşaqlar və fiziki məhdudiyyətli şəxslər üçün hərəkəti müşkülə çevirib. Problemi aradan qaldırmaq məqsədilə quraşdırılan lift isə uzun müddətdir fəaliyyət göstərmir. Nəticədə sakinlər ya körpüdən istifadə edə bilmirlər, ya da magistral yolu piyada keçərək inzibati məsuliyyət riski ilə üzləşirlər. Mövcud vəziyyət yerli əhalinin narazılığına səbəb olub.
Məsələ ilə bağlı aidiyyəti qurumların mövqeyini öyrənməyə çalışdıq.
Ağdaş Rayon İcra Hakimiyyətindən (RİH) sorğumuza cavab olaraq bildirilib ki, aidiyyəti məsələ ilə bağlı qurum tərəfindən Azərbaycan Avtomobil Yolları Dövlət Agentliyinə (AAYDA) məktub ünvanlanıb.
AAYDA isə sorğumuza cavabında, mövcud problemi ərazidə yaranan texniki xarakterli nasazlıqla əlaqələndirib:
"Məsələ ilə bağlı aidiyyəti üzrə məlumat verilib, nasazlığın aradan qaldırılması və sistemin normal fəaliyyətinin bərpa edilməsi məqsədilə müvafiq tədbirlərin həyata keçirilməsi üçün uyğun addımlar atılır".
