Suqovuşan sakini: "Dağların qoynunda yerləşən bu kənddə bizim üçün hər bir şərait yaradılıb"

"Dövlət dağların qoynunda yerləşən bu kənddə bizim üçün ən yüksək səviyyədə şərait yaradılıb".

Oxu.Az "Report"a istinadən xəbər verir ki, bunu Suqovuşan kənd sakini Qırımxan Muradov deyib.

Onun sözlərinə görə, kənddə məskunlaşdırılan sakinlərin əsas vəzifəsi o torpaqları yenidən canlandırmaqdır:

"Məcburi köçkün həyatı yaşadığımız ilkin dövrdə xeyli çətinliklərlə üzləşdik. Uzun müddət çadır şəhərciyində, daha sonra isə şəraitsiz məktəb binasında yaşamışıq. Çadırda qaldığımız vaxt bəzən xırda bir ehtiyacımızı ödəmək üçün çox əziyyət çəkirdik. Artıq o günlər geridə qalıb.

İndi doğma kəndimizə qayıdırıq, dövlətimizin bizə yaratdığı bu şəraitə görə çox sevinirik. Evimizə gedib baxmışam, olduqca gözəl və müasir tələblərə uyğun qaydada inşa edilib. Dağların ətəyində yerləşən bir kənddə bu cür şəraitin yaradılması çox müsbət haldır.

Dövlətimiz bütün bu işləri bizim rahatlığımız üçün həyata keçirib. Bizim də üzərimizə düşən əsas vəzifə dövlətimizin qədrini bilmək, bu torpaqları yenidən canlandırmaqdır".