Xocalı, Xankəndi, Şuşa və Susda ilk dəfə buraxılış imtahanı keçiriləcək

Xankəndi şəhəri 4 nömrəli, Xocalı və Şuşa şəhəri 1 nömrəli tam orta məktəblərdə və Laçın rayonu Sus kənd tam orta məktəbində ilk dəfə buraxılış imtahanı keçiriləcək.

Oxu.Az xəbər verir ki, bu barədə "Report"un sorğusuna cavab olaraq Dövlət İmtahan Mərkəzindən (DİM) məlumat verilib.

Bildirilib ki, martın 2-də işğaldan azad olunmuş Ağdərə, Şuşa, Laçın, Xankəndi və Xocalı rayonlarında tam (11 illik) orta təhsil səviyyəsi üzrə buraxılış imtahanı keçiriləcək.

Bundan əlavə, Laçın rayonu 2 nömrəli tam orta məktəb, Zabux kənd tam orta məktəbi və Ağdərə rayonu Talış kənd tam orta məktəbində də buraxılış imtahanı keçiriləcək. Bu məktəblərdə buraxılış imtahanları artıq ikinci dəfə təşkil edilir.

İşğaldan azad olunan rayonlar üzrə buraxılış imtahanları yeddi binada təşkil olunacaq. İmtahanın idarə olunmasına yeddi bina nümayəndəsi və yeddi imtahan rəhbəri cəlb olunub.

Ümumilikdə işğaldan azad olunmuş rayonlardakı imtahanlarda 45 şagirdin iştirakı nəzərdə tutulub. İmtahan binalarına DİM əməkdaşları tərəfindən əvvəlcədən baxış keçirilib və lazımı hazırlıqlar görülüb.

Martın 9-da isə Zəngilan rayon Ağalı kənd tam orta məktəbində, Füzuli şəhər M.Uluqbəy adında 1 nömrəli tam orta məktəbdə və Cəbrayıl şəhər M.Mehdizadə adına tam orta məktəbdə (bu məktəbdə ilk dəfədir) buraxılış imtahanı keçiriləcək.