"İnsan alverinə dair qlobal hesabatlara nəzər saldıqda rəqəmlər dəhşətli mənzərəni ortaya qoyur. Monitorinq təşkilatı (Our Rescue) bildirir ki, hər gün internetdə, sosial şəbəkədə insan alveri üzrə qruplaşmaların 500 000 üzvü azyaşlıları tora salmağa çalışır. Beynəlxalq Əmək Təşkilatının hesabatı göstərir ki, məcburi cinsi istismar hər il 173 milyard dollar qanunsuz gəlir gətirir".
Oxu.Az xəbər verir ki, bunu Milli Məclisin İnsan hüquqları komitəsinin sədri Zahid Oruc İnsan hüquqları və Hüquq siyasəti və dövlət quruculuğu komitələrinin birgə iclasında deyib.
O bildirib ki, 2022-ci ildə qlobal miqyasda aşkar edilən insan alveri qurbanlarının sayında 2019-cu illə müqayisədə 25% artım var:
"Uşaqlar aşkar edilən qurbanların 38%-ni təşkil ediblər, 2019-cu ildən bəri uşaqların aşkarlanması 31% artıb. Qızların aşkarlanmasında daha kəskin - 38% artım müşahidə edilib. Qadınlar və qızlar aşkar edilmiş qurbanların 61%-ni təşkil ediblər. İstismara məruz qalanların 39%-i yetkin qadınlar, 22%-i qızlar olub".
"Məcburi əmək insan alverinin ən geniş yayılmış forması kimi ortaya çıxıb və aşkar edilmiş qurbanların 42%-ni təşkil edib, cinsi istismarı isə 36% ötüb. Məcburi cinayət, o cümlədən onlayn fırıldaqlar üçün insan alveri 2016-cı ildəki 1%-dən 2022-ci ildə 8%-ə yüksəlib.
Vətəndaşlara Xidmət və Sosial İnnovasiyalar üzrə Dövlət Agentliyinin Əmək Münasibətlərinin Monitorinqi Mərkəzi tərəfindən tikinti obyektlərində əmək münasibətlərinin tənzimlənməsi məqsədilə keçirilmiş 30 səyyar yoxlama zamanı 1 002 işçidən 57-nin əmək və ya xidməti (mülki) müqaviləsinin olmadığı aşkarlanıb, 12 işəgötürən hüquqi və fiziki şəxs barəsində 105 000 manat məbləğdə inzibati cərimə tətbiq edilib.
Mərahim Nəsib
