15-17 may 2026-cı il tarixlərində "The Ritz-Carlton, Baku" otelində "PAŞA Holding"in təşkilatçılığı və "Tenity" şirkətinin dəstəyi ilə "PASHA Hackathon" 6.0 yarışması keçirilib. Hakatonun builki mövzusu "Bravo" supermarket tərəfindən həyata keçirilə biləcək yeni və innovativ ideyaların təşviqinə həsr olunub.
Bu il "PASHA Hackathon"a ümumilikdə 500-ə yaxın komanda müraciət edib. Seçim mərhələsinin nəticələrinə əsasən, 56 komanda hakatonda iştirak edərək öz gücünü sınayıb.
Yarış iştirakçıları üç gün ərzində "Bravo" supermarket tərəfindən təqdim olunan biznes tapşırığı üzərində çalışaraq şirkət üçün innovativ həllər və yeni ideyalar hazırlayıblar. Hakaton boyunca "Bravo" supermarket nümayəndələri və müxtəlif sektorlardan olan 40-a yaxın mentor iştirakçılara dəstək göstərib, onların layihələrinin inkişafına töhfə verib.
Keçən il olduğu kimi, bu dəfə də hakatonun sonunda ilk üç yeri tutan komandalar müvafiq olaraq mükafatlandırılıblar: Birinci yer üçün 7 000 AZN, ikinci yer üçün 5 000 AZN, üçüncü yer üçün isə 3 000 AZN pul mükafatı təqdim olunub. Bununla yanaşı, qalib komandalar "PAŞA Holding"in daxili akselerasiya və inkubasiya proqramlarına qoşulmaq imkanı da əldə ediblər.
Qeyd edək ki, "PASHA Hackathon" innovativ məhsul və həllərin yaradılmasına yönəlmiş 48 saatlıq texnologiya yarışmasıdır. "PAŞA Holding" tərəfindən artıq 6-cı ildir təşkil olunan layihənin əsas məqsədi gənclər arasında innovativ düşüncə tərzini və həllyönümlü yanaşmanı təşviq etmək, eləcə də ölkədə innovasiya mədəniyyətinin inkişafına dəstək verməkdir.
