Amerika Birləşmiş Ştatlarının Prezidenti Donald Tramp uşaqlar üçün məsləhət görülən peyvəndlərin sayını 17-dən 11 baza vaksininə endirən sərəncam imzalayıb.
Oxu.Az xəbər verir ki, bu barədə tədbirin Ağ Evin rəsmi "YouTube" kanalında yayımlanan videoda bildirilir.
Qeyd edilib ki, uşaqlar üçün ümumi tövsiyə olunan vaksinlər siyahısından COVID-19, qrip və hepatit B-yə qarşı peyvəndlər xaric edilib. Sərəncamda, həmçinin qızılca, parotit və məxmərə xəstəliklərinə qarşı nəzərdə tutulan kombinə edilmiş MMR vaksininin üç fərqli peyvəndə ayrılması öz əksini tapıb. Bu peyvəndlərin müxtəlif vaxtlarda vurulması təklif edilir.
Bununla yanaşı, imzalanmış sənəd məcburi peyvəndləmə tələblərindən dini və tibbi xarakterli istisnaları da əhatə edir.
"Sərəncam baş prokurora tibbi və ya dini səbəblərdən vaksinasiyadan azad olunmaqla bağlı uşaqların hüquqlarını pozan ştat qanunlarına qarşı məhkəmədə iddia qaldırmağı tapşırır", - deyə Tramp bildirib.
Xatırladaq ki, ötən ilin mayında ABŞ-nin səhiyyə naziri Robert Kennedi hamilə qadınlar və sağlam uşaqlar üçün COVID-19 əleyhinə peyvənd tövsiyəsinin ləğv olunduğunu elan edib. Dekabrda isə Donald Tramp ABŞ Səhiyyə Nazirliyinə digər inkişaf etmiş dövlətlərin uşaq peyvəndləri təqvimlərini araşdırmağı və Amerikanın vaksinasiya tövsiyələrini bu standartlara uyğunlaşdırmağı əmr edib.
