ABŞ-nin Delaver Universitetinin tədqiqatçıları qasırğaların intensivliyi ilə bağlı proqnozların dəqiqliyini artırmaq üçün məlumat toplamaq məqsədilə köpəkbalıqlarından bir növ "okean sensoru" kimi istifadə etməyə başlayıblar.
Oxu.Az xəbər verir ki, bu barədə "Reuters" agentliyi məlumat yayıb.
Tədqiqat çərçivəsində köpəkbalıqlarının üzərinə suyun dərinliyini, temperaturunu və elektrik keçiriciliyini ölçə bilən xüsusi sensorlar yerləşdirilir. Köpəkbalığı suyun səthinə yaxınlaşdıqda cihazın topladığı məlumatlar peyk rabitəsi vasitəsilə mərkəzə ötürülür.
Tədqiqatın rəhbəri, Delaver Universitetinin Dəniz Elmləri və Siyasəti Məktəbinin professoru Aaron Karlaylın sözlərinə görə, mütəxəssisləri ən çox okeanın üst qatındakı istilik miqdarı maraqlandırır.
O bildirib ki, suyun məhz bu qatı qasırğaların gücünün formalaşmasında mühüm rol oynayır və onların inkişafı üçün əsas enerji mənbəyidir.
Müşahidələr aparmaq üçün mütəxəssislər müntəzəm olaraq dərin qatlarla səth arasında hərəkət edən köpəkbalığı növlərini seçirlər. Bu növlərə mako, göy və çəkicbaşlı köpəkbalıqları, eləcə də gənc ağ köpəkbalıqları daxildir.
Cihazların quraşdırılması miqrasiya edən heyvanların sahilyanı ərazilərə gəldiyi may ayında həyata keçirilir. Alimlər sahildən 50-65 kilometr məsafədə dənizə çıxaraq sensorları yırtıcıların bədəninə bərkidirlər.
