ABŞ hərbi helikopterindən siqnal raketləri ilə dolu çanta Yaponiyada yaşayış məntəqəsinə düşdü

ABŞ-nin "UH-1" tipli hərbi helikopteri Yaponiyanın sıx məskunlaşmış Okinava prefekturası üzərində uçuş zamanı içərisində pirotexniki siqnal fişəngləri olan 18 kiloqramlıq çantanı yerə salıb.

Oxu.Az-ın verdiyi məlumata görə, bu barədə Yaponiyanın Müdafiə Nazirliyi xəbər yayıb.

Hadisə ABŞ-yə məxsus Futemma aviabazasına təhkim olunmuş helikopterin uçuşu zamanı baş verib.

Sözügedən aviabaza Okinavanın sıx yaşayış olan Ginovan şəhərində yerləşir və obyektlərinin yaşayış evlərinə yaxın olması səbəbindən dünyanın ən təhlükəli hərbi bazalarından biri hesab olunur.

Düşən çantanın uzunluğu təxminən 90 sm, eni isə 30 sm-dir. Hadisə nəticəsində xəsarət alanlar barədə məlumat daxil olmayıb. Lakin çanta hələ də tapılmayıb.

Okinava sakinləri uzun müddətdir ki, Futemma bazasının prefektura ərazisindən çıxarılmasını tələb edirlər.

ABŞ hərbi helikopterindən siqnal raketləri ilə dolu çanta Yaponiyada yaşayış məntəqəsinə düşdü