Almaniya hökuməti Leypsiq/Halle hava limanında aşkarlanan pilotsuz uçuş aparatları (PUA) ilə bağlı araşdırmanı yekunlaşdırır və yaxın günlərdə baş verən hadisəyə Avropa İttifaqı (Aİ) və NATO ilə koordinasiya edilmiş cavab tədbirlərini açıqlayacaq.
Oxu.Az xəbər verir ki, bunu Almaniya kansleri Fridrix Merts ARD telekanalına müsahibəsində deyib.
"Biz artıq araşdırmanı yekunlaşdırırıq. Almaniya hökumətində necə cavab verəcəyimizlə bağlı geniş razılıq əldə olunub. Yaxın günlərdə bunu tam aydın şəkildə açıqlayacağıq", - deyə o bildirib və bunun "çox tezliklə" baş verəcəyini vurğulayıb.
Eyni zamanda, Merts Almaniyanın reaksiyasının Avropa İttifaqı və NATO ilə razılaşdırılacağını qeyd edib.
"Cavab artıq koordinasiya olunub. Yaxın günlərdə Avropa İttifaqı və NATO-dakı tərəfdaşlarımızla da yekun razılaşdırılacaq. Bu, Almaniyanın cavabı olacaq, lakin Aİ və NATO-dakı tərəfdaşlarımız üçün sürpriz olmayacaq", - deyə kansler bildirib.
Avqustun 29-da "Politico"nun Avropa nəşri və bir sıra Almaniya KİV-i Mertsin gələn həftənin əvvəlində Leypsiqdə baş verən insidentə görə məsuliyyəti Rusiyanın üzərinə qoymağı və genişmiqyaslı cavab tədbirləri elan etməyi planlaşdırdığını yazıblar.
Ehtimal olunur ki, tədbirlər Aİ-nin yeni sanksiyaları ilə Almaniyanın müstəqil addımlarının birləşməsindən ibarət olacaq. Nəşrin mənbələrinin sözlərinə görə, yeni tədbirlər ayrı-ayrı rusiyalı diplomatların ölkədən çıxarılması və ya Berlindəki Rusiya Evinin bağlanmasından daha genişmiqyaslı olacaq.
Avqustun 4-ü axşam saatlarında Leypsiq/Halle hava limanının uçuş-enmə meydanında Ukraynaya məxsus "An" yük təyyarəsinin yanında üzərində kustar üsulla hazırlanmış partlayıcı qurğu olan PUA aşkarlanıb. Detonator işə düşməyib.
Həmin gecə ikinci pilotsuz uçuş aparatı DHL şirkətinə məxsus yük təyyarəsi ilə toqquşub. Daha sonra məlum olub ki, hadisədən 10 gün sonra müstəntiqlər üçüncü PUA-nı, həmçinin güclü partlayıcı maddənin izlərini aşkarlayıblar. Bunun təxminən 50 qram heksogen olduğu ehtimal edilir.
Almaniyanın daxili işlər naziri Aleksander Dobrindt hadisəni "hibrid hücum ssenarisi" kimi qiymətləndirib və sifarişçilərin "xarici dövlətlər" ola biləcəyini istisna etməyib.
Hadisəni Almaniya Federal Baş Prokurorluğu araşdırır.
