Almaniyanın Dortmund Şəhər Prokurorluğu ölkənin qərbində, Şimali Reyn-Vestfaliya federal torpağında, Bielefeld şəhərindən 20 kilometr məsafədə yerləşən "Stalag 326 VI K" nasist hərbi əsir düşərgəsinin keçmiş mühafizəçisi barəsində araşdırma aparır.
Oxu.Az xəbər verir ki, bu barədə "Bild" qəzeti məlumat yayıb.
Nəşrin məlumatına görə, şübhəlinin hazırda 105 yaşı var. İş 2026-cı ilin fevralında nasist cinayətlərinin araşdırılması üzrə Lüdviqsburqda yerləşən Mərkəz tərəfindən prokurorluğa göndərilib. Mərkəz keçmiş mühafizəçinin işi ilə bağlı sənədləri araşdırıb.
Ümumilikdə, iş üzrə iki nəfərin adı keçib. Lakin onlardan biri sonradan vəfat edib.
Keçmiş mühafizəçi düşərgədə xidmət etdiyi dövrdə çoxsaylı qətllərə şərait yaratmaqda şübhəli bilinir. Düşərgədən 300 mindən çox insanın keçdiyi bildirilir. Müxtəlif hesablamalara görə, onlardan 15 mindən 70 minədək insan həlak olub.
Söhbət əsasən sovet hərbi əsirlərindən getsə də, "Stalag 326 VI K" düşərgəsində Belçika, İtaliya, Serbiya, Polşa və Fransadan olan məhbuslar da saxlanılıb.
Keçmiş mühafizəçi Almaniyanın ədliyyə tarixində ən yaşlı ittiham olunan şəxslərdən birinə çevrilə bilər.
