"Payız fəslinin başlaması qanla qidalanan həşəratlardan tamamilə xilas olmaq demək deyil. Bəzi hava şəraitlərində onların fəallığı daha da arta bilər".
Oxu.Az xəbər verir ki, bunu RT-yə müsahibəsində rusiyalı mütəxəssis Yelena Slynko deyib.
Onun sözlərinə görə, adətən temperatur 8-10 dərəcədən aşağı düşdükdə ağcaqanadların fəallığı azalır. Lakin isti və yağışlı sentyabr günləri gec inkişaf edən növlərin çoxalması üçün əlverişli şərait yarada bilər.
"Yüksək rütubət, eləcə də gecə və gündüz arasında kəskin temperatur fərqləri sağ qalan ağcaqanadları qış yuxusundan (diapauza) əvvəl qan axtarışında daha aqressiv edir. Payızda onların fəallığının artmasının səbəbi sadədir: dişi ağcaqanadlar qışda sağ qalmaq üçün qida maddələri toplamalı, bəzi növlər isə sonuncu dəfə yumurta qoymalıdır", - deyə mütəxəssis bildirib.
Slynko qeyd edib ki, şəhər mənzillərində əsas təhlükəni küçədə yaşayan ağcaqanadlar deyil, zirzəmilərdə məskunlaşan növlər yaradır.
"Bu həşəratların yaşaması üçün küçədəki hava temperaturu əsas amil deyil. Köhnə binaların su basmış zirzəmilərindəki istilik və durğun su onların yaşaması üçün kifayətdir. Onlar bütün il boyu çoxala və havalandırma sistemləri vasitəsilə mənzillərə daxil ola bilərlər. Buna görə də hətta noyabr ayında, çöldə mənfi temperatur olduğu halda, yataq otağında ağcaqanadla rastlaşmaq mümkündür", - deyə o xəbərdarlıq edib.
Mütəxəssisin sözlərinə görə, payızda ağcaqanad dişləməsindən sonra həmin nahiyəni qaşımaq xüsusilə təhlükəlidir. Bu, dərinin bütövlüyünün pozulmasına və infeksiya riskinin artmasına səbəb ola bilər.
