Avropa Parlamenti (AP) ötən il Avropa İttifaqı (Aİ) və ABŞ arasında bağlanmış ticarət sazişinin icrası üçün bir çox ABŞ mallarının idxalına rüsumların azaldılmasını təsdiqləyib.
Oxu.Az xəbər verir ki, bu barədə AP-nin rəsmi internet səhifəsində məlumat dərc edilib.
Səsvermə prosesində 440 parlamentari qərarı dəstəkləyib, 151 deputat isə bunun əleyhinə səs verib.
Avropa İttifaqı müxtəlif sənaye və qida məhsullarının idxalı üçün nəzərdə tutulan gömrük rüsumlarını ləğv etmək, həmçinin ABŞ-nin kənd təsərrüfatı malları üçün Avropa bazarına üstünlüklü giriş imkanı yaratmaq qərarına gəlib. Əvəzində isə ittifaqa daxil olan dövlətlərdən ixrac edilən məhsullara 15% həcmində tarif tətbiq olunacaq.
Xatırladaq ki, bundan əvvəl ABŞ Prezidenti Donald Tramp Avropa İttifaqının 4 iyul tarixinədək lazımi addımlar atmayacağı təqdirdə, daha yüksək rüsumlar tətbiq edəcəyi ilə hədələmişdi. AP-nin qərarı Aİ-ABŞ ticarət sazişinin qüvvəyə minməsi yolunda son maneə idi.
