Avstriyanın Lebersdorf şəhəri yaxınlığında keçmiş nasist konslagerinin ərazisinin bir hissəsində biznes parkının tikintisi planlaşdırılır.
Oxu.Az xəbər verir ki, bu barədə "Euronews" məlumat yayıb.
Hazırda vaxtilə böyük nasist konslagerinin yerləşdiyi ərazidə yalnız kol basmış sahədə dağılmaqda olan bir neçə beton konstruksiya qalıb. Ərazidə biznes parkı, o cümlədən soyuducu anbar və "Lidl" mağazasının tikilməsi planlaşdırılır. Bu planlar Avstriyada narazılığa səbəb olub.
Avstriyanın 1938-ci ildə nasist Almaniyasına birləşdirilməsindən sonra Vaynberqlager kompleksi minlərlə hərbi əsirin və məcburi əməyə cəlb olunan şəxslərin yerləşdirilməsi üçün istifadə edilib.
Daha sonra burada Mauthauzen konslagerinin Hirtenberq filialı yaradılıb. Bu, Avstriyada yalnız qadınlar üçün nəzərdə tutulmuş ən böyük düşərgələrdən biri olub.
Vyanadan 40 kilometr cənubda yerləşən ərazidə biznes parkının tikintisi ilə bağlı planlar 2024-cü ildə açıqlanıb. Əraziyə buldozerlərin gətirilməsindən sonra fəallar tarixi məkanın qorunmasını yenidən tələb ediblər.
Ərazini satın alan Avstriya şirkəti burada xatirə abidəsinin yaradılmasını dəstəkləməyi təklif edib. 2024-cü ildə ərazidə xatirə steli də quraşdırılıb. Lakin avqust ayında onun üzəri tikinti toru ilə örtülüb.
