Böyük Britaniyada 65 yaşlı təqaüdçü qadının rəhbərlik etdiyi ailə külli miqdarda narkotik satışına görə mühakimə edilib. Məlumata görə ailə öz "fəaliyyət"ləri müddəti ərzində dəyəri 100 milyon dollardan, çəkisi isə bir tondan çox olan kokain satışı həyata keçirib.
Bu barədə Oxu.Az "People"a istinadən xəbər verir.
Məlumata görə, Londonda "Arıların kraliçası" və "Qanqster nənə" ləqəbləri ilə tanınan Debora Meyson Böyük Britaniyada ən böyük narkokartellərindən birini təşkil etdiyinə görə 20 il müddətinə azadlıqdan məhrum edilib.
İngilislər onun cinayətini Britaniya ədliyyəsi tarixində ailə təşkilatı ilə bağlı olan ən böyük narkotik hadisələrindən biri adlandırırlar.
Beləliklə, istintaq müəyyən edib ki, qadın öz qohumları - bacısı, uşaqları, uşaqların şərikləri və hətta qızının rəfiqəsi ilə birlikdə 7 ay ərzində ölkə daxilində kokain satışı ilə məşğul olub.
Narkotik partiyalarının topdansatış dəyəri ən azı 30 milyon dollar olduğu halda, ümumi pərakəndə satış dəyəri 100 milyon dolları keçib.
Aylarla davam edən izləmələrdən sonra London polisi bu işdə əli olanların hamısını həbs edib.
Debora Meysonla yanaşı onun qızları Demi Brayt (30 yaş) və Rozanna Meyson (29 yaş) - hər biri 11 ilə qədər, digər qızı, Lilli Brayt (26 yaş) - 13 il, oğlu Redji Brayt (24 yaş) - 15 il, bacısı Tina Qoldinq (66 yaş) - 10 il, qızının ortağı Demi Kendall (31 yaş) - 13.5 il, qızının rəfiqəsi Anita Sloter (44 yaş) - 13 il müddətinə azadlıqdan məhrum ediliblər.
Ümumilikdə məhkəmə qrup üzvlərinə 106.5 il müddətinə azadlıqdan məhrumetmə cəzası verib.
