Cənubi Afrika Respublikasının (CAR) cənub-şərqində evlərdən birində baş verən silahlı insident nəticəsində aralarında hamilə qadın da olmaqla, azı 11 nəfər həyatını itirib.
Oxu.Az xəbər verir ki, bu barədə yerli EWN radiostansiyası məlumat yayıb.
Məlumata görə, hadisə zamanı daha dörd nəfər müxtəlif dərəcəli bədən xəsarətləri alıb.
Xəbərdə bildirilir ki, sentyabrın 23-nə keçən gecə üç naməlum şəxs mənzilə daxil olub. Onlar ətrafı nizamsız atəşə tutublar. Silahlı hücum nəticəsində 10 kişi və 1 qadın qətlə yetirilib.
Hüquq-mühafizə orqanlarının əməkdaşları bu hadisənin rəqib qruplaşmalar arasındakı münaqişə ilə bağlı ola biləcəyini ehtimal edirlər. Hazırda cinayətkarların axtarışı davam edir.
Qeyd edək ki, CAR dünyada ən çox qətl hadisələrinin qeydə alındığı on ölkə sırasındadır. CAR polisinin statistikasına əsasən, 2026-cı ildə ölkə ərazisində gün ərzində orta hesabla 63 nəfər öldürülür.
