Çexiyada yenidoğulmuş körpənin ölümü ilə bağlı dəhşətli hadisə araşdırılır.
Oxu.Az bu barədə "Krimi-Plzen" nəşrinə istinadən xəbər verir.
Çexiyanın Kinşperk-nad-Ohrji şəhərində 35 yaşlı qadının qayınanası həyətyanı sahədə içərisində yenidoğulmuş körpəyə aid qanlı əl və ayaq qalıqları olan polietilen paketlər aşkar edib. Körpənin bədəninin digər hissələri isə hələ də tapılmayıb. Polis qalıqların itlər tərəfindən parçalanmış ola biləcəyini ehtimal edir.
Hadisə ilə bağlı anaya qarşı xüsusilə ağır qətl maddəsi ilə ittiham irəli sürülüb və o, həbs edilib. Məlumata görə, qadın həyat yoldaşı ilə birlikdə onun valideynlərinin evində yaşayırmış.
Qonşular qadının hamiləliyinin son mərhələsində olduğunu gördüklərini, lakin sonradan qarnının qəfil kiçildiyini bildiriblər.
Xidməti itlər ərazidəki zibil konteynerlərində və yaxınlıqdakı ərazilərdə axtarış aparsalar da, körpənin digər qalıqlarını tapmaq mümkün olmayıb.
Qadının təqsiri məhkəmədə sübuta yetirilərsə, onu 15 ildən 20 ilədək azadlıqdan məhrumetmə və ya ömürlük həbs cəzası gözləyir.
